Шавкат Мирзиёев Бухорога ташрифини шамолдан зарар кўрган Олот туманидан бошлади

Шавкат Мирзиёев 21 январь, пайшанба куни Бухоро вилоятига келиб, вертолётда Олот туманига йўл олди, деб хабар бермоқда Президент матбуот хизмати.

Қайд этилишича, бу ҳудудлар иқтисодиётини ривожлантиришга қаратилган 2021 йилги биринчи ташри бўлиб, у мазкур чекка тумандан бошланаётгани бежиз эмас.

2020 йил 27 апрель куни Бухоро вилоятига жанубдан кучли шамол кириб келган эди. Уй-жойлар, инфратузилма ва экинларга катта зарар етганди.

Давлат раҳбари зудлик билан у ерга етиб бориб, табиий офат оқибатларини бартараф қилиш, турар жойлар ва ижтимоий объектларни таъмирлаш бўйича топшириқлар берган эди. Қисқа муддатда зарур ишлар бажарилиб, ҳаёт ўз маромига қайтди.

Бу галги сафар чоғида Президент вертолётда ушбу ишлар қамровини кўздан кечирди.

Хусусан, Олот, Қоракўл, Жондор, Ромитан, Пешку ва Шофиркон туманларида 45 мингта уй, 204 та кўп қаватли турар жой таъмирланган. Мингдан ортиқ ижтимоий соҳа ва тадбиркорлик объектлари, йўллар, электр, газ ва алоқа тармоқлари тикланган.

Президент шу ерлик аҳоли билан мулоқот қилди.