Тошкентда фаолият олиб бораётган дорихоналардан бири ўрнатилган тартибда кўздан кечирилганида, дорихонада фуқаро М.А. томонидан рецептсиз тарзда 363 дона капсулада кучли таъсир қилувчи «Зардекс Габапентин 300 мг» дори воситаси сотилаётгани аниқланди. Бу ҳақда Давлат божхона қўмитаси матбуот хизмати хабар берди.
Шунингдек, дорихонадаги фуқаро М.Ш. ҳам ўрнатилган тартибда кўздан кечирилган ва унинг ёнида 200 дона капсулада «Зардекс Габапентин 300 мг» дори воситаси борлиги маълум бўлган.
Давлат божхона қўмитаси Контрабандага қарши курашиш ва божхона аудити бош бошқармаси ходимларининг тезкор тадбири давом эттирилиб, фуқаро М.С.нинг яшаш хонадони ҳам ўрнатилган тартибда кўздан кечирилганида, хонадонда 76 дона капсулада «Зардекс Габапентин 300 мг» дори воситаси ва гугурт қутисида 1 дона марихуана гиёҳвандлик воситаси борлиги аниқланган.
Шу тариқа жами 639 дона капсулада кучли таъсир қилувчи «Зардекс Габапентин 300 мг» дори воситаси ва 1 грамм марихуана гиёҳвандлик воситаси ашёвий далил сифатида олинган.
Ҳозирда ҳолат юзасидан божхона органлари томонидан терговга қадар текширув ҳаракатлари давом эттирилмоқда.
Аввалроқ Андижонда салкам 1,3 млрд сўмлик дори воситалари ва тиббий буюмларнинг ноқонуний сақланаётгани аниқлангани, Тошкентдаги хонадонларнинг биридан 153 кило сохта дори воситалари топилгани тўғрисида хабар берилганди.
Изоҳ (0)