«Ходимлар жисмонан ва руҳан чарчаган» — Абдуқодир Тошқулов олий таълим вазирлигидаги дастлабки иш куни ҳақида

Олий ва ўрта махсус таълим вазирлигининг янги раҳбари Абдуқодир Тошқулов 19 январь куни вазирлик марказий аппарати барча ходимларининг тўлиқ таркибдаги иштирокида кенгайтирилган йиғилиш ўтказди. Вазирлик матбуот хизматининг хабар беришича, унда вазирлик фаолиятини самарали ташкил қилиш бўйича муҳим вазифалар жамоа иштирокида батафсил муҳокама қилинди.

Йиғилишда Абдуқодир Тошқулов вазирликдаги дастлабки уч кунлик фаолиятидан таассуротлар кишини хурсанд қилмаслигини таъкидлаган.

«Жамоада эркин ва ижодий муҳит йўқдай, ходимлар ҳорғин ва ташаббус кўрсатмайди. Сабаби иш тартиби тўғри ташкил этилмаган. Назаримда, инсон ресурслари нотўғри тасарруф қилинмоқда. Ходимлар ишда кўп вақт қолиб кетиши натижасида жисмонан ва руҳан чарчаган кўринади. Оиласига, фарзандлар тарбиясига эътибор қаратишга улгурмаса керак», — деган у ва ходимларга, аввало, иш жойида эркин ишлаш, ижодий фикрлаш, қолаверса, дам олиш учун қулай шароит яратиб бериш ва ундан кейин иш унумдорлигини талаб қилиш мумкинлигини қўшимча қилган.

Вазир, шунингдек, айрим структуралар қониқарсиз фаолият юритаётгани, бугунги кун талабларига жавоб бермаслигини қайд этган. Унинг сўзларига кўра, бундан буён ҳар бир бошқарма ва бўлим фаолияти натижадорлиги мониторинг қилинади, самарали фаолият юритган мутахассислар муносиб тақдирланади, аксинча ўз функционал вазифаларини бажармайдиган ходимлар билан тузилган меҳнат шартномаси бекор қилинади.

Абдуқодир Тошқулов вазирлик ахборот хизмати фаолиятини ҳам танқид қилган.

«Ахборот хизмати вазирликнинг юзи бўлиши керак. Бугунги ахборот асрида тезкор ва профессионал ёндашув талаб этилади. Ижтимоий тармоқларда соҳага оид танқидий материаллар эълон қилиниб, жамоатчилик томонидан кенг муҳокама қилинаётган бир вақтда, ахборот хизмати томошабин бўлиб туришини қандай изоҳлаш мумкин?» — деган у.

Вазир, шунингдек, бошқарувда ва ахборот алмашишда замонавий АКТ имкониятларидан унумли фойдаланиш зарурлиги, ОТМларга юборилаётган топшириқларни мувофиқлаштириш, бир-бирини такрорлайдиган вазифаларни қисқартириш, ижро интизомига қатъий риоя қилиш лозимлигини айтиб ўтган.

«Бугундан бошлаб жамоа билан янгича иш тартибига ўтсак: қоғозбозликни имкон қадар камайтириш, ортиқча мажлисбозликка чек қўйиш ва ўз ишимизга меҳр билан муносабатда бўлиб, ундан завқланиб ишлайлик», — дея ходимларни вазифаларга масъулият билан ёндашиб ишлашга чақирган.

Вазир таълим муассасалари билан ишлаш принципларида ҳам қайта кўриб чиқиладиган жиҳатлар мавжудлигига эътибор қаратган. У вазирлик олдида таълим сифатини таъминлашдек ўта масъулиятли вазифа турганини қайд этган.

«Олий таълим муассасасида мавжуд бўлган муаммони кимга айтишини билмай юрган раҳбарларнинг дардини биринчи навбатда вазирлик, биз, тинглашимиз ва уни ҳал қилиб бериш чораларини кўришимиз керак. Олдин тизимдаги раҳбарлар, профессор-ўқитувчилар ва ходимлар учун етарли шарт-шароит яратишимиз лозим, ундан кейингина улар олдига вазифаларни қўйсак, тўғри бўлади», — деган олий ва ўрта махсус таълим вазири.

Эслатиб ўтамиз, Термиз давлат университети ректори лавозимида ишлаб келган Абдуқодир Тошқулов 14 январь куни олий ва ўрта махсус таълим вазири этиб тайинланганди. Шавкат Мирзиёев собиқ олий таълим вазири Иномжон Мажидов (Ўзбекистон Миллий университетига ректор бўлди) тизимда ўзгаришлар қилолмагани учун лавозимидан озод этилганини айтганди.