Халқ депутатлари Тошкент шаҳар кенгашининг 19 январь куни бўлиб ўтган 31-сессиясида Жаҳонгир Ортиқхўжаев Тошкент шаҳар Кенгашидаги ҳар бир депутатга 2 миллиард сўмдан пул берилиб, ўзлари лозим деб топган мақсадлар учун ишлатиши, Тошкент шаҳар Кенгаши депутатлари ихтиёрига бюджет тушумининг орттириб бажарилган қисмидан 120 миллиард сўм маблағ берилиши, шунингдек, Тошкент шаҳри туманларидаги депутатларнинг ҳар бири 100 миллион сўм миқдоридаги маблағларни йўналтириш имконига эга бўлишини маълум қилганди.
Олий Мажлис Қонунчилик палатаси депутати Расул Кушербаев бунга ўз муносабатини билдирди.
«Тўғриси, Тошкент шаҳар Кенгаши депутатларига ҳавасим келяпти. Боиси жойларда сайловчилар билан учрашувлар вақти биз мамлакат миқёсида қабул қилаётган қонунлар ва давлат бюджети ҳақида маълумот беришимизга қарамай, сайловчилар ўзи яшаётган кўча қачон таъмирланиши, симёғочлар қачон алмаштирилиши, қачон ичимлик суви келиши каби масалалар бўйича саволлар беришади. Уларга шу кўпроқ қизиқ. Бу ҳам табиий ҳол.
Афсуски, депутатда бу каби алоҳида муаммоларни ҳал этиш учун сўров, илтимос ва мурожаат киритиш ҳуқуқи бор, холос. Алам қиладигани, жойида аниқлаган муаммони тезда бартараф этиш учун маблағни йўналтириш имкони йўқ: ё қайсидир вазирлик ё ҳокимликка ялиниш керак. Ва натижа ҳам шундан келиб чиқади», — деган у.
Кушербаев ҳар бир Олий Мажлис депутатлари учун ҳам шундай амалиёт қилинса, депутатлардан сайловчиларнинг розилиги ошишини таъкидлаган.
«Бу ўринда Халқ депутатлари Тошкент шаҳар Кенгаши ва ҳокимлик ўртасидаги ушбу қадамни чин дилдан қўллаб-қувватлайман ва бошқа ҳудудлар ҳам намуна олса бўладиган тажриба деб ҳисоблайман. Албатта, агар ҳудудлардаги яккаҳоким, Кенгаш раиси бўлган раҳбарлар сал депутатлар учун ҳам қайишиб, улар билан ҳисоблашишни ‘ўзига паст кетиш’ деб тушунишмаса», — дейди депутат.
Кушербаев ушбу маблағлар сайловчилар томонидан билдирилаётган энг муҳим муаммоларни бартараф этишга йўналтирилишини, бу орқали сайловчилар депутатнинг ҳақиқий кучини кўра олишини таъкидлаган.
Шаҳар ҳокимлиги, шунингдек, бир вақтнинг ўзида туманлар маҳаллий бюджети тушумларининг орттириб бажарилган қисмидан маҳаллалардаги мавжуд муаммоларни жойида бартараф этиш учун ҳар бир маҳалла фуқаролари йиғини раисларига 50 миллион сўмдан ажратилишини (519 та маҳалла—жами қарийб 26 миллиард сўм) маълум қилганди.
«Менимча, шаҳар Кенгаши ва ҳокимлик жамоаси жамоатчилик билан ишлаш ва ҳисоблашишни амалда ҳам ўзининг устувор масаласи сифатида кўряпти. Хуллас, бўлаётган ўзгаришларга кўз тегмасин», — деган Олий Мажлис Қонунчилик палатаси депутати.
Изоҳ (0)