20 январь куни «Янги Ангрен» ИЭСда юз берган портлаш оқибатида уч киши ҳалок бўлгани, яна уч киши турли даражада куйиш тан жароҳати олгани ҳақида хабар берилган эди. Энергетика вазирлиги «Дарё»га маълум қилишича, вафот этганлар ҳамда жароҳат олганларнинг оила аъзоларига моддий ва маънавий ёрдам кўрсатилди.
Вазирликнинг маълум қилишича, 19 январь куни Янги Ангрен иссиқлик электр станциясининг 5-сон энергоблоги қозон агрегатидаги нуқсон туфайли таъмирга чиқарилган. Электр станция 560 МВт қувват билан ишлаган. 4 та энергоблок ишда, битта энергоблок захирада бўлган.
20 январь куни «Востокэнерготеплоизоляция» АЖ ва «Энергоқозонтозалаш» МЧЖнинг таъмирлаш ишларини бажарадиган пудрат ташкилотлари ишни хавфсиз бажариш учун йўриқнома ўтказилиб ишга қўйилган.
Энергоблок қозон агрегатида таъмир ишларини бажариш вақтида кўмир кукуни ҳаво аралашмасининг чақнаши содир бўлган. Оқибатда «Востокэнерготеплоизоляция» АЖнинг 3 нафар ходими олинган жароҳатлар натижасида вафот этган, «Энергоқозонтозалаш» МЧЖнинг 3 нафар ходими турли даражадаги куйиш жароҳатлари олишган. Айни пайтда улар шифохонада шифокорлар назорати остида, уларнинг аҳволи барқарор деб баҳоланмоқда.
Мазкур ҳолат юзасидан Энергетика вазирлиги раҳбарияти, Фавқулодда вазиятлар вазирлиги ва бошқа тегишли идора вакиллари «Янги Ангрен» ИЭСга зудлик билан етиб борган.
Вазирлик, шунингдек, ижтимоий тармоқларда тарқатилган видео архив характерга эгалиги, у бугунги воқеаларга алоқадор эмаслигини билдирди.
Ҳозирда Ангрен шаҳар прокуратураси томонидан терговга қадар текширув ҳаракатлари олиб борилмоқда.
Изоҳ (0)