Oliy va o‘rta maxsus ta’lim vazirligining sobiq rahbari Inomjon Majidov tizimda o‘zgarishlar qilolmagani uchun lavozimidan ozod etilgan. Bu haqda 19-yanvar kuni Prezident Shavkat Mirziyoyev raisligida o‘tkazilayotgan ma’naviy-ma’rifiy ishlar ta’sirchanligini yanada oshirishga bag‘ishlangan videoselektor yig‘ilishida so‘z yuritildi, deya xabar bermoqda “Daryo” muxbiri Mirolim Isajonov.

Foto: Prezident matbuot xizmati

“Bugungi rektorlarning birortasini yoshlar tarbiyasi va ma’naviyatini yuksaltirishda tashabbuskor sifatida namuna qilib ko‘rsata olmayman. Hammasi tomoshabin bo‘lib yuradi, barchasining oyog‘i yerdan uzilgan. Hozir rektorlar ham o‘zgaradigan vaqt keldi”, – dedi davlat rahbari.

Prezident yaqinda faoliyatini boshlagan oliy va o‘rta maxsus ta’lim vaziri Abduqodir Toshqulov haqida ham so‘z yuritdi.

“Avvalgi vazir aravasini tortmadi. Shuning uchun Toshqulovni o‘zim vazir qilib tayinladim. Uni Toshkentdagi ayrim rektorlar yoqtirmasligi mumkin. Ammo Toshqulovni sinash kerak emas, uni o‘zim ko‘p yillar davomida sinaganman. Juda bilimli, tashabbuskor va yangilikka intiluvchan yigit. U tizimda o‘zgarishlar qilishiga ishonaman”, – dedi Shavkat Mirziyoyev.

Eslatib o‘tamiz, Inomjon Majidov 14-yanvar kuni lavozimdan olinib, O‘zbekiston Milliy universitetiga rektor qilib tayinlangandi. Uning o‘rniga Termiz davlat universiteti rektori Abduqodir Toshqulov vazir etib tayinlandi.