Қашқадарё вилояти Қарши шаҳри Буюк Турон кўчасида минглаб дарахтларнинг қўпорилаётганлиги ҳақида Экология ва атроф-муҳитни муҳофаза қилиш давлат қўмитаси хабар берди.
Қўмитанинг Экология ва атроф-муҳитни муҳофаза қилиш инспекцияси ва Қашқадарё вилояти ҳудудий бошқармаси инспекторлари белгиланган манзил бўйича мурожаатни ўрганиб чиққан.
Ўрганиш натижаларига кўра, вилоят ҳокими қарорига асосан ажратилган 10 гектар ер майдонида кичик саноат зонаси ташкил этилаётган бўлган. Мазкур ҳудуддаги 2874 туп ҳар хил турдаги дарахт давлат рақами (555 СА 70) экскаватор техника воситаси ёрдамида илдизи билан қўпорилганлиги аниқланган ва ҳолат юзасидан далолатнома тузилган.
Экология қўмитаси матбуот хизмати маълумотларига кўра, Қарши шаҳар қурилиш бўлимининг 2020 йил 23 ноябрдаги Қарши шаҳар «Буюк Турон» МФЙ, Буюк Турон кўчасида ташкил этилаётган кичик саноат зонаси ҳудудидаги экинзор ва дарахтларни таг қисмидан олиб ташлаш тўғрисидаги мурожаатига жавобан Қарши шаҳар Экология ва атроф-муҳитни муҳофаза қилиш инспекцияси томонидан дарахт ва буталарни кесиш тартиби кўрсатиб ўтилган ҳолда, дарахт ва буталарни кесишга рухсат берилмаган.
Шу билан бирга, ажратилган 10 гектар ер майдонида ташкил этилаётган кичик саноат зонаси бўйича Давлат экология қўмитасининг экологик хулосаси олинмаганлиги аниқланган.
Ҳозирда юқоридаги ҳолат юзасидан тўпланган ҳужжатлар ҳуқуқий баҳо берилиши учун ҳуқуқни муҳофаза қилиш органларига тақдим этилган.
«Gazeta.uz»нинг Давлат экология қўмитаси матбуот хизматига таяниб ёзишича, ушбу ҳудуддаги 12 гектар ердан ҳозирги кунга қадар аҳоли фойдаланган.
«Дарахт кесишларини тўхтатишгандан кейинги ҳолат бу. Бир суткадан кўпроқ вақтда дарахт кесиш бошланган. Муаммо нимадан келиб чиқяпти? Одамлар бўлиб-бўлиб олган, лекин олганлиги тўғрисида ҳеч қандай ҳужжат йўқ. Аҳолинининг агар томорқа ҳудуди бўлганида, у мевали дарахтлар ўзининг мулки ҳисобланар эди. Хоҳласа кесиши мумкин эди. Лекин ўша ер кадастр ҳужжатларида белгиланмаганлиги сабабли бу табиат мулки ҳисобланади ва давлатнинг захира ери саналади. Шу пайтгача ҳам захира ери ҳисобланган, лекин аҳоли ундан фойланиб келаверган. Бу ҳам Қарши шаҳар ҳокимияти томонидан қилинган ноқонуний ҳолат. Чунки захира ерини аҳоли фойдаланишига бериш мумкин эмас. Жиноят аломатлари жуда юқори», — дейди Экология қўмитаси матбуот котиби Бунёд Абдуллаев.
Бундан ташқари, Қашқадарёдаги экология инспекцияси чалғитилгани ва бу аҳолининг томорқа ери деб келишганлиги маълум қилинган.
«Бироқ ҳужжатлар текширилганда ернинг фақат 3 гектарида 24 минг дарахт борлиги аниқланган (қолган 7 гектар ердаги дарахтлар сони суриштирилмоқда — таҳр.), улардан 2874 тупи кесиб ташланган. Қолганлари сақлаб қолинди», — деб қўшимча қилди Бунёд Абдуллаев.
Аввалроқ Сергели туманида 14 туп дарахт экскаватор билан қўпорилгани ва бунинг оқибатида ўсимлик дунёсига 151 миллион сўмлик зарар етказилгани тўғрисида хабар берилганди.
Изоҳ (0)