iPhone 13’да бармоқ изи сканери пайдо бўлади

iPhone 13 тақдимотига ҳали анча вақт бор, бироқ ҳозирда у ҳақида турли миш-мишлар пайдо бўла бошлади. Bloomberg нашри Apple 2021 йилда тақдим этадиган смартфонларида экран остида жойлашадиган бармоқ изи сканерини синовдан ўтказаётганини маълум қилди, деб хабар беради Hi-Tech.Mail.ru.

Афтидан, Apple фойдаланувчининг иккита идентификация технологиясини бирлаштиришни анчадан буён режалаштириб юрган кўринади — Face ID юзни сканер қилиш функциясидан ҳозирда компаниянинг кўплаб смартфонларида фойдаланилмоқда. Бунга қадар алоҳида Home тугмаси мавжуд бўлган бўлса, эндиликда сканер экран остида жойлаштирилади — Android-смартфонлар каби.

Шундай қилиб, фойдаланувчиларда смартфонни ёқиш учун кўпроқ имконият пайдо бўлади. Масалан, пандемия шароитида ниқоблар сабаб юз орқали смартфонни блокдан чиқаришда муаммолар юзага келган, қишда эса қўлқопларни ечишга тўғри келади. Ушбу икки усулнинг бирлашуви, ҳар биридаги камчиликни қоплашга ёрдам беради.

Шунингдек, Apple қувватлантириш разёмидан бутунлай воз кечиш ниятида. Компания Lightning’дан USB Type-C’га ўтишни режалаштирмаяпти, тўлиқ симсиз қувватлантиришга ўтмоқчи.

Бундан ташқари, Apple янги йўналиш — букланувчан смартфон устида иш олиб бормоқда. Компаниядагилар «кўринмас» шарнирларга эга бу каби қурилмаларнинг бир нечтасини синовдан ўтказмоқда.

Аввалроқ Apple томонидан 2021 йилда тақдим этиладиган смартфонлар линейкаси iPhone 12s номини олиши тўғрисида хабар берилганди.