Хоразм вилояти ҳокими ўринбосарининг укасига тегишли компания тендерда 20 миллиард сўмлик давлат буюртмасини ютгани маълум бўлганди. Коррупцияга қарши курашиш агентлиги Хоразм вилояти ҳокимлиги ягона буюртмачи инжиниринг компанияси томонидан 2020 йилда ўтказилган тендер савдосининг «Давлат харидлари тўғрисида»ги қонун ва бошқа қонуности ҳужжатларга мувофиқлигини ўрганди.
Хусусан, Хоразм вилояти ҳокимининг 2020 йил 21 февралдаги 65-сон қарори билан тендер комиссия таркиби тасдиқланган бўлиб, комиссия раиси сифатида Хоразм вилояти ҳокимининг капитал қурилиш, коммуникациялар, коммунал хўжалик ва ободонлаштириш масалалари бўйича ўринбосари Б.Қурбанов, комиссия раиси ўринбосари сифатида Хоразм вилояти ҳокимлиги ҳузуридаги ягона буюртмачи инжиниринг компанияси директори Қ.Раҳимов белгиланган.
Вилоят ҳокимлиги ягона буюртмачи инжиниринг компанияси томонидан 7018648-сонли лот орқали ўтказилган бошланғич нархи 20 миллиард 380 миллион 686 минг сўм бўлган «Урганч шаҳридаги перинатал марказни реконструкция қилиш» объекти бўйича «Бунёдкор» МЧЖ, «Урганч Қурилиш Бетон» МЧЖ ва «Ирдимзон Қурилиш» хусусий корхонаси томонидан оферталар тақдим қилинган.
Мазкур лот рақами бўйича ўтказилган тендер натижалари бўйича 2020 йил 23 июнь кунги 4/131-сонли баённомага кўра, «Бунёдкор» МЧЖ 20 миллиард 180 миллион 686 минг 966 сўм таклиф қилган ҳолда тендер ғолиби бўлиб, 2020 йил 25 июнь кунги ПМ №1-2020 тартиб рақамли пудрат шартномасига асосан, мазкур МЧЖ томонидан перинатал марказни реконструкция қилиш ишлари олиб борилмоқда.
Ушбу лот бўйича ўтказилган тендер ҳужжатлари ўрганилганда 2020 йил 11 июнь ва 2020 йил 23 июнь кунлари ўтказилган тендер савдо йиғилишларида комиссия раиси (Б.Қурбанов) ва унинг ўринбосари (Қ.Раҳимов) аслида иштирок этмаган бўлса-да, мазкур йиғилиш баённомаларини имзолаб тасдиқлаганлар.
Шунингдек, ўрганиш жараёнида «Бунёдкор» МЧЖнинг таъсисчиси Улуғбек Шарипович Қурбанов Хоразм вилояти ҳокимининг капитал қурилиш коммуникациялар, коммунал хўжалик ва ободонлаштириш масалалари бўйича ўринбосари, тендер комиссияси раиси Баҳром Шарипович Қурбановнинг яқин қариндоши, яъни туғишган укаси эканлиги маълум бўлди.
Бу ҳолат эса «Давлат харидлари тўғрисида»ги 472-сонли қонунининг 5-, 19-, 39-моддаларида белгиланган талабларга зиддир.
Бундан ташқари, вилоят ҳокимлигининг 2020 йил 11 июндаги 144-ф сон фармойишига кўра соғлиқни сақлаш объектларини фойдаланишга қабул қилиш ҳудудий давлат комиссияси таркибида Б.Ш.Қурбанов ҳудудий давлат қабул ҳайъати раиси сифатида белгиланган.
Келгусида Урганч шаҳридаги перинатал марказини реконструкция қилиш объектида қурилиш ва таъмирлаш ишлари якунлангач, мазкур объектни фойдаланишга қабул қилиш жараёнида турли қонун бузилишларининг олдини олиш мақсадида мазкур объектни қабул қилишда Б.Ш.Қурбановни давлат қабул ҳайъати раиси сифатида фаолият юритиш масаласини кўриб чиқиш мақсадга мувофиқ.
Юқорида қайд қилинган қонун бузилиши ҳолатларига йўл қўйган Хоразм вилояти ҳокимининг капитал қурилиш, коммуникациялар, коммунал хўжалик ва ободонлаштириш масалалари бўйича ўринбосари Б.Қурбанов, Хоразм вилояти ҳокимлиги ягона буюртмачи инжиниринг компанияси директори Қ.Раҳимов ва бошқаларнинг хатти-ҳаракатлари юзасидан Хоразм вилояти ҳокимлигига коррупцияни келтириб чиқарувчи сабаб ва шарт-шароитларни бартараф этиш чораларини кўриш тўғрисида тақдимнома киритилди.
Шунингдек, Хоразм вилояти прокуратураси иш юритувидаги вилоят ҳокимлиги ягона буюртмачи инжиниринг компанияси мансабдор шахсларга нисбатан Жиноят кодексининг 205-моддаси билан қўзғатилиб, тергов ҳаракатлари олиб борилаётган жиноят иши тергови жараёнида вилоят ҳокими ўринбосари Б.Қурбанов, Хоразм вилояти ҳокимлиги ягона буюртмачи инжиниринг компанияси директори Қ.Раҳимов ва бошқаларнинг хатти-ҳаракатларини тергов йўли билан текшириб, қонуний баҳо бериш ва тергов натижалари тўғрисида агентликка ахборот бериш юзасидан Хоразм вилояти прокуратурасига сўровнома юборилди.
Ҳолат юзасидан келгусида қўшимча ахборот тақдим этилиши таъкидланди.
Аввалроқ Навоийда бир неча млрд сўмлик давлат буюртмаларини тендер буюртмачиси раҳбари оиласига тегишли корхона қўлга киритгани, вилоятдаги кўплаб қурилиш ишлари амалдорларга алоқадор компаниялар томонидан бажарилгани ҳамда бир неча юз млрд сўмлик лойиҳаларни вилоят ҳокими ўринбосарининг қариндошлари қўлга киритгани маълум бўлгани ҳақида хабар берилганди.
Изоҳ (0)