Ўзбекистонда ҳайдовчиликка ўқиётганлар давомати ва ўқув жараёни онлайн назорат қилинади

Ўзбекистонда ҳайдовчилик гувоҳномасини олмоқчи бўлганларнинг давомати ва ўқув жараёнини онлайн назорат қилиш йўлга қўйилиши мумкин. Бу ҳақда ИИВ Йўл ҳаракати хавфсизлиги бош бошқармаси хабар берди.

2021 йилда Давлат йўл ҳаракати хавфсизлиги хизмати соҳасида қатор истиқболли режалар амалга оширилиши кутилмоқда. Жумладан, ҳайдовчилик гувоҳномасини олиш учун ўқиётган номзодлар давомати ва ўқув жараёнини онлайн тарзда назорат қилиш тизимини яратиш режалаштирилган.

Бундан ташқари, 2021 йилда транспорт воситаларини давлат рўйхатидан ўтказишда аризаларни онлайн юбориш ҳам жорий этилиши кутилмоқда. Тўловларни эса тўлиқ биллинг тизимига ўтказиш мўлжалланган. Бу фуқароларнинг сабабсиз кутиб қолишлари олдини олишга ёрдам бериши айтилмоқда.

Аввалроқ Ўзбекистонда тадбиркорларга йўлларда қоидабузарликни қайд этувчи камералар ўрнатиш ва ҳайдовчилик гувоҳномаси учун имтиҳонлар ўтказиш ҳуқуқи берилгани ҳақида хабар қилинганди.