Қашқадарёда Damas ҳайдовчилари одам ташишга рухсат берилмагани сабаб 150 нафар киши ишсиз қолганини айтди. Транспорт бошқармаси масъули бунга изоҳ берди

Қашқадарё вилоятининг Косон туманида яшовчи Damas ҳайдовчилари уларга одам ташишга рухсат берилмаётгани сабаб 150 нафар ҳайдовчи ишсиз қолганини айтиб, шикоят қилди. Мазкур саволга жавоб берган вилоят Транспорт бошқармаси бошлиғи Нарзулла Намозов Damas’чилар фаолиятини тартибга солувчи уюшмалар иш ўрни яратмагани учун уларнинг фаолиятидан воз кечилаётганини билдирди.

Бу ҳақда хабар берган «Дарё» мухбирининг ёзишича, ишсиз қолаётган ҳайдовчилар вилоят Транспорт бошқармаси томонидан 2021 йил 16 январь куни ташкил этилган пресс-турда қатнашаётган журналист ва блогерларга шикоят қилиб, ёрдам сўраган.

«2007 йилдан бери Damas’да одам ташиш билан шуғулланиб келаман. 2020 йил карантин сабаб Damas’да одам ташиш тақиқаланди. Ва карантин даврида умуман ишлай олмадик. Ҳолбуки, бизнинг қонуний лицензиямиз бор ва ҳали муддати тугамаган. Шунга қарамасдан айни кунга келиб ҳам бизнинг фаолият юритишимизга рухсат берилмаяпти. Аммо автобуслар бемалол одам ташимоқда. Биз ҳам оила боқувчисимиз. Контракт асосида ўқиётган фарзандларимиз бор. Уларни ҳам ўйлашимиз керак», — дейди ҳайдовчи Рустам Нурбобоев.

Журналист ва блогерлар билан суҳбатлашган Шуҳрат Султоновнинг маълумот беришича, Damas’лар фаолиятига рухсат берилмагани сабаб туманда 150 нафар ҳайдовчи ишсиз қолган.

«Карантин деб сабаб келтиришса, нима учун 30 нафар йўловчи ташувчи автобуслар фаолиятига рухсат бор-у, 6 нафар йўловчи ташувчи Damas’ларга ишлаш мумкин эмас», — дейди ҳайдовчи Шуҳрат Султонов.

Ҳайдовчиларнинг мазкур эътирозини тинглаган вилоят Транспорт бошқармаси бошлиғи Нарзулла Намозов Damas’лар фаолиятини тартибга солувчи уюшмалар қонуний тарзда бирорта ҳам иш ўрни яратмаганини айтиб, шу боис ҳам уюшмалар назоратидаги Damas’лар фаолиятидан воз кечилаётганини, уларнинг ўрнига автобуслар танланаётганини билдирди.

«Косон туманининг ўзига 30-40 та автобус олиб келинади. Марҳамат олинг ва ишланг. Битта автобусга тўрт нафар ҳайдовчи олинади. Ҳайдовчилар ишсиз қолмайди. Damas’лар фаолияти бўлди энди. Damas ўзини ўзи банд қилиш бўлди. Иш ўрни яратилмаган. Хоҳлаган ‘таксопаркъни кўринг, бирорта иш ўрни йўқ», — деди Нарзулла Намозов.

Ҳайдовчилар ва бошқарма бошлиғи ўртасидаги суҳбатдан маълум бўлишича, Damas’чилар фаолияти давомида аъзолигидаги уюшмага ойига 350 минг сўм пул тўлаган. Аммо ойлик маош олмаган. Уюшмага тўлаган 350 минг сўм пулидан ташқари топган пули ўзига қолган.

Эслатиб ўтамиз, коронавирус тарқалишининг олдини олиш мақсадида 2020 йил 22 мартдан Тошкентда жамоат транспортларига қўйилган вақтинчалик тақиқ 2020 йил 23 мартдан бошлаб Қашқадарёда ҳам жорий қилинганди ва Damas’лар фаолиятига чек қўйилганди. Шундан бери вилоятда Damas’да одам ташишга рухсат берилмади.