Қашқадарё вилоятининг Деҳқонобод туманида яшовчи фуқаро хонадонидаги отхона деворларини бузаётганда отасидан қолган милтиқни топиб олган. Бу ҳақда «Дарё»га туман ИИБ бошлиғи ўринбосари Дилшод Мирзаев маълум қилди.
Дилшод Мирзаевнинг маълумот беришича, қурол туманнинг Найман қишлоғида яшовчи фуқаро хонадонидан топилган.
«Туман ИИБга 2021 йил 14 январь куни келиб тушган хабарга кўра, вилоят ИИБ ТЕҚКБ TЧҲ Камар ТБ бошлиғи майор Ф.Шарипов, туман ИИБ ҲПБ бошлиғи майор Ш.Ҳакимов, туман ИИБ ҲПБ профилактика инспектори катта лейтенанти Б.Маллаевлар томонидан олиб борилган тушунтириш ва тарғибот тадбирлари давомида Деҳқонобод туманининг ‘Ингичка’ МФЙ Найман қишлоғида яшовчи фуқаро отхонасининг деворини бузаётган вақтида марҳум отасидан қолган милтиқни топиб олган», — дейди Дилшод Мирзаев.
Айтилишича, фуқаронинг отасидан (1921—1989 йилларда яшаган) 1 дона, 1 нилли, 16 калибрли, ишлаб чиқарилган санаси ноаниқ бўлган ўқотар ов қуроли қолган. Ўғил отадан қолган қуролни топиб олгач, ўз ихтиёри билан туман ИИБга топширган.
Эслатиб ўтамиз, Жиноят кодексининг 248-моддасига мувофиқ қуролни, патронларни, ўқ-дориларни, портловчи моддаларни ва портлатиш қурилмаларини ўз ихтиёри билан топширган жисмоний ва юридик шахс қонун ҳужжатларида белгиланган жавобгарликдан озод қилинади.
Шунингдек, Вазирлар Маҳкамасининг «Рўйхатга олинмаган қуролни, патронларни, ўқ-дориларни, портловчи моддаларни ва портлатиш қурилмаларини ички ишлар органларига ўз ихтиёри билан топшириш тартиби тўғрисидаги низомни тасдиқлаш ҳақида»ги қарорига кўра, жисмоний ёки юридик шахс ички ишлар органларига қурол ва (ёки) уларнинг ўқ-дориларини ўз ихтиёри билан топширганлиги учун пул мукофоти билан тақдирланиши, 1974 йилгача ишлаб чиқарилган фуқаровий ўқотар қурол топширган жисмоний шахс эса уни имтиёзли олиш ҳуқуқига эга бўлиши мумкин.
Изоҳ (0)