Пестум архиепископи Жованни д’Аниелло Ўзбекистондаги янги апостол нунцийси (Ватикан элчиси) этиб тайинланди. Бу ҳақда Ватикан матбуот хизматига таяниб «Дунё» агентлиги хабар берди.
Рим папаси Францискнинг қарорига кўра, 66 ёшли дипломат бир вақтнинг ўзида Россия ва Ўзбекистонда Ватикан манфаатларини билдиради.
Жованни дъАниелло 1955 йил 5 январь куни Италияда туғилган. Ўрта мактаб ва гимназияни тугатгач, Салерно шаҳридаги Минтақалараро семинария ва Кампано Папа семинариясида фалсафа ва илоҳиёт йўналишларида таълим олган. У Римдаги Папа Латеран университети ва Муқаддас Фома Папа университетида каноник ҳуқуқни ўрганган, каноник ҳуқуқ доктори илмий унвонига сазовор бўлган.
Бундан аввалроқ дипломат Ватиканнинг Бразилия, Камбожа ва Таиланддаги элчиси лавозимларида ишлаган, Конго, Лаос ва Мьянмада фаолият юритган.
Жованни д’Аниелло Челестино Милоре ўрнига тайинланди. Челестино Милоре эса Ватиканнинг Франциядаги элчиси сифатида фаолиятини давом эттирмоқда.
Эслатиб ўтамиз, 2020 йилнинг декабрида Ўзбекистон элчиси Жаҳонгир Ғаниев Рим-католик черкови раҳбари Францискга ишонч ёрлиғи топширган эди.
Изоҳ (0)