Таниқли шоира Гулчеҳра Нуруллаева 2021 йилнинг 15 январь куни 83 ёшида оламдан ўтди, дея хабар бермоқда Ўзбекистон ёзувчилар уюшмаси.
Гулчеҳра Нуруллаева 1938 йилда Тошкент вилоятининг Чоштепа қишлоғида туғилган. 1956—1964 йилларда Тошкент университетининг журналистика бўлимида таҳсил олган.
У 1961—1967 йилларда «Ўзбекистон хотин-қизлари» журналида ишлаган. 1967—1969 йилларда эса Москвадаги икки йиллик олий адабиёт курсида ўқиган.
Олий адабиёт курсини тугатгач, Ғафур Ғулом номидаги адабиёт ва санъат нашриётида муҳаррир (1969—1970), Осиё ва Африка мамлакатлари таржима асарлари таҳририяти муҳаррири (1970—1971), «Саодат» журналида масъул котиб (1976—1976), Ўзбекистон Ёзувчилар уюшмасида адабий маслаҳатчи (1981—1983, 1985—1986), «Юлдузча» нашриётида директор (1986—1987), Ўзбекистон Ёзувчилар уюшмаси котиби (1991—1993) вазифаларида ишлаган.
Нуруллаеванинг биринчи шеърий тўплами 1965 йилда «Қуёш табассуми» номи билан чоп этилган. Шоиранинг турли йилларда «Орзуларим қоқади қанот», «Ташнаман», «Иккинчи баҳор», «Лирика», «Бағишлов», «Пахта ҳиди», «Нурли нуқталар», «Муҳаббатнинг суврати» номли китоблари ҳам чоп этилган.
Саида Зуннунова шоира ҳақида қуйидагича фикр билдирган эди: «Мен унинг шеърларини ҳамма вақт ўқиб, кузатиб бораман. Шоира ҳиссиётидаги нафислик, теранлик, аёл қалбига хос майинлик ҳамма вақт мени хурсанд қилади. Гулчеҳра шеърлари устида қунт билан ишлайди. Бу унинг сатрларининг пишиқлигидан, янги, чиройли образлар топа билишидан кўриниб туради».
Шоира ўзининг танқидий фикрлари учун 1990 йилларда маълум муддат таъқибга учраган, Ёзувчилар уюшмаси аъзолигидан четлатилган. 2018 йилнинг ноябрь ойида эса у Ўзбекистон Ёзувчилар уюшмаси аъзолигига қайта қабул қилинган.
Шунингдек, 2019 йилнинг 9 май куни Ўзбекистон фахрийларни ижтимоий қўллаб-қувватлаш «Нуроний» жамғармаси томонидан I даражали «Меҳнат фахрийси» кўкрак нишони (олтин медали) билан тақдирланган.
Гулчеҳра Нуруллаева 16 январь куни Тошкентдаги Дўмбиробод қабристонига дафн этилди.
Аввалроқ Академик Тўлқин Бекмуродов 85 ёшида, Ўзбекистон халқ шоири Тўлан Низом ҳамда журналист ва ёзувчи Сотволди Ражабов вафот этгани ҳақида хабар берилганди.
Изоҳ (0)