Соғлиқни сақлаш вазирининг тегишли буйруғи билан Республика шошилинч тиббий ёрдам илмий маркази Жиззах филиали директори лавозимида ишлаб келган Даврон Тўлаганов Республика шошилинч тиббий ёрдам илмий марказига бош директор этиб тайинланди. Бу ҳақда вазирлик матбуот хизмати хабар берди.
Тиббиёт фанлари доктори Даврон Тўлаганов кўп йиллар Республика шошилинч тиббий ёрдам илмий маркази тизимида турли вазифаларда ишлаб келган. 2016—2017 йилларда Республика шошилинч тиббий ёрдам илмий маркази бош шифокор муовини вазифасини бажарувчи бўлган.
Маълумот учун, бирлаштирилган шошилинч тиббий ёрдам хизмати таркибига Республика шошилинч тиббий ёрдам илмий маркази, унинг 13 та вилоят филиали, 176 та туман ва шаҳар тиббиёт бирлашмаларининг шошилинч тиббий ёрдам бўлими, 2400 дан ортиқ тез тиббий ёрдам бригадаси, санитар-авиация хизмати ва фавқулодда вазиятларда аҳолини тиббий таъминлаш тезкор бригадалари киради.
Эслатиб ўтамиз, Тўлагановга қадар Республика шошилинч тиббий ёрдам илмий марказига бош директор сифатида Абдуҳаким Хожибоев ишлаб келган. У 2020 йилнинг ноябрида Президент фармони билан Ўзбекистон соғлиқни сақлаш вазири этиб тайинланганди.
Аввалроқ Қашқадарё вилоят соғлиқни сақлаш бошқармаси бошлиғи ўзгаргани, шунингдек, Тиббиёт ходимларининг касбий малакасини ривожлантириш маркази раҳбарига ўринбосар тайинлангани тўғрисида хабар берилганди.
Изоҳ (0)