Ўзбекистонда дам олиш кунлари ҳам об-ҳаво илиқ бўлади, аммо келаси ҳафтадан совуқ қайтади

Ўзбекистон аҳолисини дам олиш кунлари жуда илиқ об-ҳаво кутмоқда, деб хабар бермоқда «Ўзгидромет».

Қайд этилишича, 15 ва 16 январь кунлари республика бўйича об-ҳавони паст босим майдони белгилайди. Бундай вазиятда Эрон ҳудудларидан жуда қуруқ ва илиқ ҳаво кириб келиши кутилмоқда.

Ҳаво ҳарорати кундузи 15—20 даража илиққача, жанубда 22 даража илиққача, кечалари 0—5 даража илиқ атрофида бўлади. Ҳаво ҳарорати иқлим меъёридан 10—12 даражага юқори бўлади.

17- январь, якшанба куни Ўзбекистон ҳудудларига Каспий денгизи ҳудудларидан булутли массивлар кириб келади, бунинг натижасида булутлилик зичлашади ва кундуз куни ҳаво ҳарорати 13—16 даража илиққача бир оз пасаяди, кечаси 0—5 даража илиқ атрофида бўлади. Аммо бундай ҳарорат ҳали ҳам иқлим меъёрларидан 5—7 даражага юқори бўлади.

Шу кунларда Ўзбекистоннинг тоғли ҳудудлари бўйича қор кўчиши хавфи эълон қилинган.

«Бироқ бу иссиқ ҳали баҳор эмас. Кейинги ҳафтада яна совуқ бўлади», — деб қайд этган «Ўзгидромет».