Афсуски, 100 фоизга ўсма пайдо бўлиши хавфини бартараф этишга имкон берадиган аниқ ва тасдиқланган стратегия мавжуд эмас. Аммо ушбу соҳадаги мутахассислар томонидан ўтказилган кўплаб тадқиқотлар касаллик хавфини сезиларли даражада оширадиган омилларни аниқлашга ёрдам берди. Талаб қилинадиган нарса уларни билиш ва чеклашдир.
Ортиқча ширинликлар истеъмоли
Шакарнинг қанчалик зарарли эканлиги ва ундан бутунлай воз кечиш зарурлиги тўғрисида мунозаралар ўн йилдан кўпроқ вақтдан бери давом этмоқда. Эҳтимол, яна давом этар. Аммо айтиш керак бўлган аниқ нарса шуки, шакарни меъёридан кўп истеъмол қилиш кўкрак бези саратони ривожланиш хавфини ошириш мумкин. Олиб борилган изланишларда ҳар куни шакарга ўхшаш дозани қабул қилган сичқонлар тез орада кўкрак бези саратонига мойиллигини намоён қилган. Олимлар иложи борича ортиқча шакардан сақланишни ва мевалар таркибида бўлувчи табиий ширани истеъмол қилишни тавсия этади.
Иссиқ ичимликлар танлови
Жуда иссиқ чой ёки қаҳвани севиб ичувчилар талайгина. Энди эса ўйлаб кўриш керак, яқинда «Халқаро Онкология» журналида чоп этилган тадқиқот шуни кўрсатдики, иссиқ ичимликлар истеъмол қилиш қизилўнгач саратони хавфини оширади. Иссиқ суюқлик туфайли қизилўнгач деворларида юз берадиган тирналиш хусусияти охир-оқибатда саратон касаллигининг ривожланишига олиб келиши мумкин.
Тунги сменада ишлаш
Тўлиқ айтганда, тунда ишлаш ва саратон хавфи ўртасидаги боғлиқликни ўрганадиган кўплаб тадқиқотлар мавжуд эмас, аммо деярли барча изланишлар буни тасдиқлаган. Олимларнинг фикрига кўра, ишнинг бу каби режими иммунитет тизимига зарар етказади ва яллиғланиш, натижада саратон ривожланиши хавфини оширади. Имкон қадар тунларни уйқусиз ўтказишдан воз кечиш керак.
Ўтириб ишлаш режими
Ҳаракатсиз турмуш тарзи танага кунига бир ёки икки қути сигарет чекиш каби зарар етказади. Ҳаракатсиз одамларнинг хавфли касалликлар рўйхатида саратон касаллиги охирги ўриндан анча юқорида ўрин олган. Сабаби шундаки, ҳаракат қанча кам бўлса, кислород қон оқимига шунча кам киради ва қон оқими сустлашади, ҳужайралар эса кисолородга эга бўлмайди. Иложи борича ҳаракат талаб этадиган фаолият билан шуғулланиш керак. Агар касб ўтириб ишлаш билан боғлиқ бўлса, мунтазам равишда енгил машқлар бажаришга вақт ажратиш лозим.
Ортиқча вазн
Албатта, буни одат деб атаб бўлмайди. Аммо ортиқча вазн қизилўнгач, ошқозон ости бези, ичак, буйрак, қалқонсимон без ва кўкрак саратони касалликларининг ривожланиш хавфи билан билан алоқадор. Организмдаги ортиқча ёғ табиий гормонал мувозанатни бузиши ва яллиғланиш, шунингдек, ўсма пайдо бўлишига олиб келиши мумкин бўлган эстроген гормонини ишлаб чиқаришни кўпайтиради.
Витамин ва қўшимчалар қабул қилиш
Одатда озиқ-овқат қўшимчалари ва витамин комплекслари организмдаги етишмовчиликни тўлдириш учун ичилади ва бу тўлиқ тиббий текширувдан сўнг белгиланиши керак. Аммо амалда одамлар ўзларининг ҳолатларидан бехабар ҳолда дозаларни белгилайди ва кўрсаткичлар даражаси ортиб кетади. Витамин комплекслари дори воситаси эмаслигига қарамай, уларни эҳтиёткорлик билан қабул қилиш керак. Шифокор тавсиясисиз ўзбошимчалик билан қабул қилмаслик зарур.
Изоҳ (0)