Пошнали туфли оёқларни, аёл қомати ва юришини чиройли кўрсатади. Аммо бундай оёқ кийим кийишни маъқул кўрадиганлар чиройли кўринишга эга бўлиш билан бирга саломатлигида, хусусан, оёқ суяги, пай ва қон-томирларида муаммолар кўзга ташланиши мумкин.
Физика нуқтаи назаридан пошнали оёқ кийим кийишнинг зарари
Бундай оёқ кийим табиий биомеханик ҳаракатга халақит беради. Оёқ учида юргандек бўлгани учун оёқ кафтининг олд қисмига оғирлик тушиб унинг рессорлик вазифасида муаммо кузатилади. Тана амортизаторида муаммо кузатилиши эса бошқа суяк-мушак тизимига ҳам таъсир қилмай қолмайди.
Умуртқа поғонаси ҳам баланд пошна кийгандан азият чекади. Умумий дисбаланс ҳисобига бел қисми оғрийди, гавда эса азият чекади. Елка ва бўйин мушакларида оғриш, мияга кислород етиб бормаслиги ҳамда мигрен ҳам кузатилиши мумкин.
Баланд пошна кийганда оёқда юз берадиган салбий ҳолатлар:
Яссиоёқлик
Оёқ кафтининг зўриқиши ҳисобига қон яхши айланмайди, тўқималар дегенерацияси, мушак ва пайлар атрофияси кузатилади. Бу эса вақт ўтиши билан кўндаланг яссиоёқликка пайдо бўлишига сабаб бўлиши мумкин.
Ҳаллух Валгус
Доимий равишда пошна кийганда оёқ кафти суяклари деформация бўлади ҳамда катта бармоқда шишлар кузатилиши мумкин.
Ахиллит
Кун давомида пошнали оёқ кийимда юриб кейин кроссовка ёки юмшоқ оёқ кийим кийиб олинганда Ахиллов пайлари яллиғланиши кузатилиши мумкин.
Хаглунд деформацияси
Ушбу деформация орқа қисми ҳаддан ортиқ қаттиқ бўлган пошнали пойабзал киядиганларда кўпроқ кузатилади ва «Золушка синдроми» деб ҳам аталади.
Шунингдек, доимий пошнада юрадиганларда югуриш марафони иштирокчиларидаги сингари оёқ кафтида синиш ва турли шикастланишлар кузатилиши мумкин.
Кимларга пошнали туфли кийиш тақиқланади?
Хомиладорларга
Хомиладорликда оғирлик, оёқнинг зўриқиши шундоқ ҳам кўп бўлади. Қолаверса релаксин гормони таъсирида пайлар чўзилиши кузатилади ва биргина ножўя ҳаракат жиддий жароҳатланишга олиб келиши мумкин.
Ўсмирларга
Шифокорлар гавда скелети шаклланишининг тугалланиши арафасидаги 18-20 ёшдаги қизларга узоқ вақт давомида пошнали туфлида юрмаслик кераклигини тавсия қилади. Ёшлигидан пошнали туфлига ўрганганларда бора-бора Ахиллов пайлари контрактураси кузатилиши мумкин. Унинг ривожланиши оқибатида оёқнинг ҳаракатланишида муаммо кузатилиши ва оғриқ сезилиши мумкин.
Аммо мутахассислар текис оёқ кийим ҳам оёқлар учун зарарли эканини айтиб, баландлиги 2-4 сантиметр бўлган пошнали пойабзал кийишни тавсия қилади. Маълумотларга қараганда, Рим императори Юлий Цезарнинг армиясидагилар ҳам 2,5 см қалинликдаги пойабзалларда эркин ва самарали ҳаракатланган. Таг қисми қаттиқ бўлмаган ва оёқни яхши ушлаб турадиган пойабзаллар педиатрлар нуқтаи назаридан энг мақбули ҳисобланади.
Қолаверса, мутахассислар олд қисми учли бўлган туфлиларни танламасликни тавсия қилади. Бундай пойабзалларни узоқ вақт кийиш деформация, хусусан, шиш пайдо бўлишига олиб келади. Шунингдек, бу бармоқлар қийшайиши ва тирноқнинг нотўғри ўсишига ҳам сабаб бўлиши мумкин.
Изоҳ (0)