Жиззах шаҳрининг Мустақиллик кўчасида қурилаётган кўп қаватли уйнинг бир қисми 10 январь куни қулаб тушгани тўғрисида хабар берилганди. Zo‘r TV телеканалининг «Бу кун» дастури воқеа жойидан лавҳа тайёрлаб, ҳолат юзасидан олиб борилаётган ишлар тўғрисида маълумот берди.
Жиззах шаҳар ҳокими ўринбосари Рустам Ҳусановнинг сўзларига кўра, дастлабки тахминлар бўйича кўнгилсиз ҳодиса қурилиш меъёри қоидаларига тўлиқ амал қилинмаганлиги сабаб юзага келган.
«Юқори қаватларда оғир конструкциялар ишлатилиб, пастки юк кўтарувчи конструкцияларга зарар етиб, қулашга олиб келтирган», — дейди Жиззах шаҳри бош меъмори Воҳиджон Мирзаев.
«Зилол» маҳалла фуқаролар йиғини раиси Абдували Норматовнинг сўзларига кўра, бино хусусий тадбиркор томонидан қурилаётган бўлиб, ишлар ҳали якунланмаган. Декабрь охирларида қурилиш ишлари тўхтатилган. «Янги йил арафаси бу ерда ҳеч ким ишламаётган эди», — дейди маҳалла раиси.
«25 декабрдан кейин ишламаган, ишчилар ҳам бўлмаган, атрофида ҳам ҳеч қанақа ҳаракатлар бўлмаган, фуқароларга тан жароҳати етмаган, ўлим ҳолати йўқ, — дея таъкидлайди шаҳар ФВБ бошлиғи ўринбосари Мунир Жуманов. Унинг айтишича, қидирув-қутқарув ишлари ҳали охирига етмаган.
Мутахассисларнинг маълум қилишича, қулаб тушган бино ёнидаги 6 қаватли иншоотнинг ҳам пойдеворларида чўкиш аломатлари кузатилган бўлиб, ҳозирда у хавфли ҳолатда турибди.
«Ушбу бинолар бир-бирига ёнма-ён қурилган бўлиб, қулаш жараёнида иккинчи бинога ҳам зарар етган бўлиши мумкин. Эҳтиёт чораси сифатида фуқароларнинг ҳаракатланиши ҳамда уларнинг ҳудуддан ўтишини вақтинча тўхтатиб турибмиз», — дейди ФВБ масъули.
Телеканал журналистлари бино қурилиши билан шуғулланган «Чорвадор-Қоракўл-Барака» МЧЖ вакилларидан ҳолат бўйича маълумот олишга уринган, аммо тадбиркор бу борада ҳеч қандай изоҳ бермаган.
Жиззах шаҳар бош меъморининг берган маълумотига кўра, тадбиркор қулаган бинонинг орқасидаги иншоотни ўзбошимчалик билан ноқонуний қуриб олган.
Таъкидланишича, «Чорвадор-Қоракўл-Барака» МЧЖ раҳбарига бир нечта савдо дўконлари ҳам тегишли бўлиб, у биринчи маротаба бу каби қўп қаватли турар жой биносини қуриш билан шуғулланган.
«Биздаги маълумотларга кўра, аввал ҳеч қандай кўп қаватли бино қурмаган», — дейди шаҳар бош меъмори.
Изоҳ (0)