«Наманган сув таъминоти» МЧЖ мутахассислари ва авария хизмати томонидан Наманган шаҳридаги юқори босимли магистрал ичимлик суви тармоғида содир бўлган носозликлар бартараф этилди, деб хабар беради «Ўзсувтаъминот» матбуот хизмати.
9 январь Андижон шаҳрига ичимлик суви етказиб берувчи Хонобод—Андижон марказий сув қувурининг Андижон тумани «Хортум» маҳалласида жойлашган сув тақсимлаш жиҳозида носозлик юзага келиб, бутун шаҳар ичимлик сувидан узилган эди. Сув тақсимлаш жиҳозининг ёрилишига об-ҳавонинг кескин совиб кетиши сабаб бўлгани айтилган.
«11 январь куни содир бўлган носозликлар соат 18:25 да бартараф этилиб, аҳоли ва бошқа истеъмолчиларга бир маромда ичимлик суви етказиб бериш йўлга қўйилди», – дейилади «Ўзсувтаъминот» хабарида.
«Kun.uz» нашрининг «Андижон сув таъминоти» МЧЖ Андижон шаҳар филиали раҳбари Ҳумоюн Алимовга таяниб маълум қилишича, қувур зулфини алмаштириш тўлиқ якунланган, 11 январь оқшомида Хонобод–Андижон марказий қувурига сув очилиб, Андижон шаҳри аҳолисига тоза ичимлик суви бериш бошланган.
«Бугун сув қувури зулфинини алмаштириш тўлиқ якунланди. Соат 23:00 да Андижон шаҳрининг 30 фоиз қисмига ичимлик суви бериш бошланди. 12 январдан сув бериш ҳажми босқичма-босқич оширилиб, шаҳар аҳолиси 100 фоиз сув билан таъминланади», – дейди Алимов.
Аввалроқ Қашқадарёда электр узилишлари сабабли сув таъминоти тўхтагани тўғрисида хабар берилганди.
Изоҳ (0)