Арманистон ҳукумати коронавирус инфекциясининг тарқалиши билан боғлиқ вазият туфайли 11 январгача жорий этилган карантин чораларини 11 июлгача узайтирди, дея хабар бермоқда «РИА Новости».
Арманистонда карантин 11 сентябрда 6 ойга киритилган бўлиб, энди у яна 6 ой — 11 июлгача давом этади.
11 январь, душанба куни қабул қилинган қарорга биноан, чет элликлар Арманистонга боришдан кўпи билан 72 соат олдин ўтказилган ПЦР тестларининг салбий натижаларига эга бўлса, уларга нафақат ҳаво йўли билан, балки ерусти назорат пунктлари орқали киришга ҳам рухсат берилади. Чет эл фуқаролари, шунингдек, чегара божхона постида коронавирусга тест топширишлари ва ўзларини изоляция қилиб, унинг натижаларини кутиши мумкин.
Бундан ташқари, оммавий тадбирларда қатнашувчилар сони бўйича чекловлар ҳам олиб ташланди. Олдинроқ бундай тадбирларда 60 нафаргача иштирокчиларга рухсат берилган эди. Шунингдек, ёпиқ ҳудудларда тадбирлар ўтказишга ҳам рухсат берилади.
Аввалроқ Арманистон парламенти коронавирус эпидемиясига қарши фавқулодда ҳолат режимисиз карантин орқали курашиш механизмларини кўзда тутувчи қонунчилик пакетини қабул қилган эди. Қонун лойиҳаси карантин доирасида эпидемия ҳудудида кириш ва чиқишнинг алоҳида режимини ўрнатиш, давлат чегараси орқали қатновларни тўхтатиш ёки чеклаш, фуқаролар ва транспорт воситаларининг эркин ҳаракатланишини чеклаш, кузатиш, ўз-ўзини яккалаш ва изоляцияга рухсат беради.
Изоҳ (0)