Молдова президенти Майя Санду биринчи расмий ташриф билан Украинага автомобилда жўнаб кетди, деб ёзади «РБК» президент матбуот хизматига таяниб.
Президент матбуот котиби Сорина Штефирца аниқлик киритишича, харажатларни камайтириш мақсадида делегация Киевга самолётда эмас, машинада етиб олишга қарор қилган. Унинг сўзларига кўра, бу пандемия даврида бирон жойга боришнинг энг самарали усулидир.
Украина ва Молдова вакилларининг расмий учрашуви 12 январда бўлиб ўтади. Санду Украина президенти Владимир Зеленский, бош вазир Денис Шмигал ва парламент спикери Дмитрий Разумков билан учрашувлар ўтказади.
Молдова делегацияси таркибига президентдан ташқари тўққиз киши кирди. Шу жумладан, президентнинг ташқи сиёсат бўйича маслаҳатчиси Кристина Герасимов, Молдованинг Украинадаги элчиси Руслан Болбочан, президентнинг энергетика бўйича маслаҳатчиси Сержиу Тофилат.
Бу Сандунинг биринчи расмий хорижий сафаридир.
Молдованинг аввалги президенти Игор Додон ноябрдаги сайловларда 57,74 фоиз овоз тўплаган Сандуга енгилди. Санду 24 декабрь куни лавозимига киришди.
Изоҳ (0)