Давлат хавфсизлик хизмати ва Бош прокуратура ҳузуридаги иқтисодий жиноятларга қарши курашиш департаменти ходимлари республиканинг бир нечта вилоятларида мансабдор шахслар томонидан амалга оширилган коррупцион ҳуқуқбузарликлар ҳолатига барҳам берди. Бу ҳақда «Ўзбекистон 24» телеканали орқали маълум қилинди.
Тошкентда тижорат банкларидан бирининг бошқарув раиси 4 миллиард сўм миқдорида кредит ажратиш эвазига 15 минг доллар талаб қилган. ДХХ ва департамент тезкор ходимлари томонидан ўтказилган тезкор тадбирда мазкур банк раҳбари сўралган пулдан 103 миллион сўмини танишига тегишли МЧЖнинг ҳисоб рақамига ўтказиш орқали қўлга киритгани аниқланган.
Шунингдек, Самарқанд вилоятидаги марказий бозор директори ҳамда унинг укаси маҳаллий тадбиркорга тикувчилик цехи ва дўкон қуриш учун ер ажратишга ваъда бериб, бунинг эвазига 10 минг доллар талаб қилган. Улар рухсатнома учун берилган 5 минг доллар пулни олаётганида ушланган.
Бундан ташқари, Қаршидаги жазони ижро этиш муассасасида хизмат қилган ИИВ Қоровул қўшинлари нозири 5 минг доллар пора олаётганида қўлга тушган. Ушбу пуллар қамоқхонадаги маҳбуслардан бирига мобил телефон, шунингдек, келажакда бошқа буюмларни етказиб бериш учун эвазига унинг танишлари томонидан берилган.
Бухоро вилоятидаги туман ҳокимликларидан бирининг вояга етмаганлар билан ишлаш бўйича масъул котиби туман марказидан дўкон қуриш учун 4 сотих ер ажратишга ёрдам беришни ваъда қилган. У талаб қилинган 4 минг долларнинг ярмини олдиндан олаётганида ушланган.
Аниқланган ҳолатлар бўйича жиноят иши қўзғатилган, тергов ҳаракатлари олиб борилмоқда.
Аввалроқ Ургутда фуқарога 2 минг доллар эвазига ерга эгалик ҳуқуқини олиб беришни ваъда қилган кадастр хизмати ходими ушлангани, Бўстонлиқдаги 1 гектар ерни расмийлаштириб бериш учун 160 минг доллар талаб қилган шахс қўлга олингани, шунингдек, Тошкентда 352 минг долларга ер сотмоқчи бўлган туман ҳокимлиги мансабдори ушлангани тўғрисида хабар берилганди.
Изоҳ (0)