Трамп Байденнинг инаугурация маросимига бормаслигини айтди

«Бу ҳақда мендан сўраганларнинг барчасига шуни маълум қиламан: 20 январь куни инаугурацияга бормайман», – деб ёзди у Twitter’да.

Трамп 8 январь куни кечқурун асосий эътиборни ҳукуматни Байден маъмуриятига тинч йўл билан топширишни таъминлашга қаратишини ваъда қилди. Аммо тарафдорларига уларнинг «ақл бовар қилмайдиган саёҳати эндигина бошланаётгани»ни айтди. Шу билан бирга, Трамп сайлов натижаларига суд орқали эътироз билдириш имконияти тугаганини таъкидлади.

Эслатиб ўтамиз, 6 январь куни Трамп тарафдорлари АҚШ Конгресси сайлов натижаларини тасдиқлаб, Жо Байденнинг ғалабасини расман тасдиқлаши керак бўлган Капитолий биносини шиддатли ҳужум билан эгаллаб олди. Сайловчилар ҳайъати аъзоларининг овозларини ҳисоблаш жараёни тўхтатилиб, 7 январь куни эрталаб давом эттирилди. Тартибсизликлар оқибатида беш киши ҳалок бўлди, ўнлаб полициячилар яраланди.

Капитолийда тартиб тиклангач, Вакиллар Палатаси ва АҚШ Сенати Байденнинг ғалабасини маъқуллади.

Инаугурация 20 январга белгиланган, аммо Трампни зудлик билан ҳокимиятдан четлатиш талаблари демократлар орасида янграй бошлади.