Сурхондарё вилоятида дўкондан телефонлар ўғирлаган шахс ушланди, дея хабар қилмоқда Тергов департаменти.
Қайд этилишича, 2020 йилнинг 15 декабрь куни 28 ёшли Ботир З. Сариосиё тумани ИИБ бошлиғига ариза билан мурожаат қилган.
Унда аризачи номаълум шахс Сариосиё тумани «Мирзо Улуғбек» маҳалласи ҳудудида жойлашган «Қўзигул файз» савдо мажмуасида жойлашган телефон аксессуарлари дўконидан 10 дона умумий нархи 26 миллион 900 минг сўмлик телефон аппаратини ўғирлаб кетганлигини, ушбу номаълум шахсларни аниқлаб, уларга нисбатан қонуний чора кўришни ҳамда ўзига етказилган моддий зарарни ундириб беришни сўраган.
Мазкур мурожаат юзасидан 2020 йилнинг 16 декабрь куни Сариосиё тумани ИИБ ҳузуридаги Тергов бўлинмаси томонидан номаълум шахсларга нисбатан Жиноят кодексининг 169-моддаси 2-қисми «г» банди (уй-жой, омборхона ёки бошқа хонага ғайриқонуний равишда кириб содир этилган ўғрилик) билан жиноят иши қўзғатилган.
Жиноят иши юзасидан олиб борилган тезкор қидирув ҳаракатлари натижасида ушбу жиноятни Узун туманида яшовчи Диловар А. содир этганлиги аниқланиб, унинг яна бир қатор туманларда шунга ўхшаш жиноятларни содир этгани маълум бўлган. Ўғирланган 1 дона Samsung А 01 Cоrе русумли телефон аппаратини Диловар А. танишига берганлиги аниқланиб, шу танишидан ушбу телефон аппарати тегишли тартибда расмийлаштириб олинган.
Ҳозирда тергов ҳаракатлари давом эттирилмоқда ҳамда ўғирланган телефон аппаратларини топиш чоралари кўрилмоқда.
Аввалроқ Наманганда 15 ёшли бола дўкондан 16 та телефон ўғирлагани аниқлангани, Навоийда маҳалладошларининг чорва молларини ўғирлаган уч тадбиркор қўлга олингани ҳамда Бухорода қўшнисининг уйидан қиймати 8,5 миллион сўмлик буюмларни ўғирлаган 17 ёшли қиз ушлангани ҳақида хабар берилганди.
Изоҳ (0)