«Хоразм ҳудудий электр тармоқлари корхонаси» бош директори Муродбой Базаримбетов пора олишда гумон қилиниб, ҳибсга олинди. Бу ҳақда «Дарё»га «Ҳудудий электр тармоқлари» корхонаси маълум қилди.
«Kun.uz»нинг Урганч шаҳар халқ депутатлари кенгаши аъзосига таяниб маълум қилишича, Базаримбетов ўртага ишончли одамини қўйиб, ёнилғи қуйиш шохобчасини электр тармоғига улаб бериш учун тадбиркордан 20 минг АҚШ доллари сўраганликда гумонланмоқда. Кейинчалик бу қиймат 15 мингга туширилган.
Шундан сўнг тадбиркор депутатга шикоят қилган. У эса ўз навбатида ҳуқуқ-тартибот идораларини хабардор қилган.
Улар махсус тадбирда ўртадаги шахсни ҳамкорлик қилишга кўндирган. 24 декабрь куни ўртадаги ишончли шахс пулни Базаримбетовнинг кабинетига киритиб берганидан сўнг, ҳуқуқ-тартибот идоралари ходимлари раҳбарни қўлга олган.
Депутатнинг сўзларига кўра, тезкор тадбирда ўртадаги шахс ва раҳбарнинг мулоқоти ёзиб олинган. Аудиоёзувларда раҳбарнинг ўртадаги шахсга қарата айтган «Пулнинг ҳаммасини бердими? Ҳаммасини олдингми? Мана бу тумбочкага қўй» деган сўзлари бор.
Айни пайтда Базаримбетов ҳибсда сақланмоқда ва ҳолат юзасидан тергов ҳаракатлари олиб борилмоқда.
Аввалроқ бир неча миллиард сўмлик давлат буюртмаларини тендер буюртмачиси раҳбари оиласига тегишли корхона қўлга киритгани маълум бўлгани, Сардобада 4 гектар ерни полиз экинларини экишга ажратиб бергани учун 20 миллион сўм пора олган уюшма раиси ушлангани ҳамда Тошкентда 352 минг долларга ер сотмоқчи бўлган туман ҳокимлиги мансабдори қўлга олингани ҳақида хабар берилганди.
Изоҳ (0)