Маълумки, энг замонавий ва сифатли гўзаллик маҳсулотлари Японияда ишлаб чиқарилади. Балки шунинг учун ҳам япон аёлларининг териси тиниқ ва чиройли бўлса керак. Терига ғамхўрлик қилишнинг ўзига хос сирлари билан «Терининг инқилобий японча парвариши − ҳар қандай ёшда терини қай тарзда гўзал қилиш мумкин?» китоби муаллифи Чизу Саеки бўлишди.
Ишончли маҳсулот
«Кўп миқдорда турфа косметик воситалардан фойдаланиш терининг бузилишига олиб келади. Сабаби турли хил таркибга эга воситалар реакцияга киришиши ёки қарама-қараши таъсир кўрсатиши мумкин. Япон аёлларининг гўзаллик сири – мунтазамлик ва қатъий режим, − дейди муаллиф ўз китобида. − Доимо тонгда юзлар махсус лосьон ёрдамида ювилади, сўнгра намлантирувчи крем, албатта, суртилиши керак. Ухлашдан аввал ҳам худди шу қоида амалга оширилади. Ҳеч қандай камчилик ва қолдиришларсиз. Натижа икки ҳафтада аён бўлади».
«Еб бўлмайдиган маҳсулотни юзга суртманг»
«Агар бирон маҳсулотни ея олмасангиз, уни терига суртманг», − дейди Чизу Саеки. − Балки мен ҳаддан ташқари ошириб юборгандирман, ҳеч ким крем ёки лосьон истеъмол қилмайди, лекин охир-оқибат тери юзасига суртилган восита қон оқимига кириб боришини эслатиб ўтмоқчиман. Шунинг учун қўлланиладиган воситалар таркибини кузатиш керак. Уларнинг таркибида табиий экстрактлар қанча кўп бўлса, шунча фойдали бўлади».
Матоли ниқоблар
«Илк бора ипак матоси атиргул суви билан намланиб, юзга қўйилган. Бу тарихда биринчи яратилган мато ниқоби эди. Бундай ниқоблардан фойдаланилганда маҳсулот таркибидаги фойдали моддаларнинг кириб бориш чуқурлиги кўп марта ошади ва самараси ҳам сезилади. Шунинг учун тайёр ниқоб сотиб олишнинг ҳожати йўқ. Уй шароитида ҳам ниқоб тайёрлаб, уни юзга суртиш ва устидан енгил мато ёпиб, терини парвариш қилиш мумкин».
Японча массаж
«Қаришни секинлаштирувчи ушбу массаж тери мустаҳкам ва текис бўлишига ёрдам беради».
Юзни тўғри тозалаш
«Косметик воситалар орасида энг қимматбаҳоси – бу юзни тозаловчи маҳсулотдир. Крем, лосьон ёки бошқалардан ҳам кўра кўпроқ тозаловчи восита терига мос бўлиши керак. Унинг мақбулини танлаш учун алоҳида вақт ажратишга эринмаслик керак, − дейди мутахассис. − Тўғри тозаланган юз бошқаларникига қараганда анча ёш кўринади ва алоҳида парвариш талаб этмайди. Ҳеч бўлмаганда кунига икки маҳал тозалаш воситасидан фойдаланиш тавсия этилади. Агар имкон бўлса, тез-тез амалга ошириш зарар қилмайди».
Барча ҳолатлар учун мойлар
«Бутун дунё ёғсиз маҳсулотларга эътибор қаратаётган бир вақтда шуни айтиш мумкинки, фақат ёғларгина терини эрта қаришдан сақлайди. Улар терини юмшатади, озиқлантиради ва соғлом бўлишга ёрдам беради. Тери учун мос келадиган ёғдан иложи борича кўпроқ фойдаланиш керак. Ҳаттоки овқат тайёрлаш жараёнида ҳам юзга ёғларни суртиш мумкин. Тери ёғли бўлиб кетишидан хавотир олишнинг кераги йўқ, у фақат ўзи учун керакли нарсани олади, ортиқчасини ўзлаштирмайди».
Ванна қабул қилиш учун махсус кун
«Ҳафтада камида бир марта ванна қабул қилиш учун махсус кун ташкил этиш керак. Бутун вужуд буғ ёрдамида тозаланади, узоқ вақт дам олади. Шундан сўнг тана учун фойдали ёғлар суртиш керак. Ушбу жисмоний тозаланиш модда алмашинуви жараёнларини, лимфа оқимини яхшилайди, стрессни бартараф этади», − дейди китоб муаллифи.
Шуни ёдда тутиш керакки, тери парвариши ўта нозик масала бўлиб, япон аёлларига мос келган восита бошқаларга тўғри келмаслиги мумкин. Уларни кун тартибига киритишдан аввал косметолог билан маслаҳатлашиш тавсия этилади.
Изоҳ (0)