Қишки совуқ ҳарорат ва ёпиқ бинолардаги иситиш печларининг ҳавони қуритиб юбориши одам саломатлиги, хусусан, қўл териси аҳволига ҳам таъсир қилади. Унинг силлиқ, таранг ва яхши кўринишига эга бўлиш ва ҳимоя қилиш учун эса мунтазам равишда парвариш қилиш муҳим ҳисобланади.
Тозаловчи воситаларнинг таркибини ўрганиб чиқиб кейин танланг
Ҳар гал қўл ювилганда кир ва бактериялар билан бирга қўлни ортиқча қуруқликдан ҳимоя қиладиган ёғ қатлами ҳам ювилиб кетади. Совуқ мавсум ва иситиш печлари билан уй ҳамда биноларнинг иситилгани сабаб эса ушбу қатламнинг тикланиши учун одатдагидан кўпроқ вақт кетади, бунинг ҳисобига тери тез қуриб қолади ва шикастланади. Бунинг олдини олиш учун эса оддий ювиш воситасини таркибида намлантирадиган крем бўлган воситага ўзгартириш керак. Шунингдек, қўлингизни қайноқ бўлмаган илиқ сувда ювишга ҳаракат қилинг, бу терини камроқ шикастлайди.
Иложи борича кўпроқ қўл кремларидан фойдаланинг
Ҳар гал қўлингизни сувга урганингиз, қоғозлар билан ишлаганингиз ҳамда кўчага чиққанда қўлингизга крем суртишни унутманг, бу қўлнинг ҳимоя қатламини ҳимоя қилишга ёрдам беради. Шу сабаб ҳам нафақат уйда, иш столингиз ёки сумкангизда қўл креми бўлишига эътибор қаратинг.
Қўлқопсиз кўчага чиқманг
Ҳаво ҳарорати +10 градусдан пасайиши билан кўчага қўлқоп киймасдан чиқа кўрманг. Бу қўлларингизнинг совуқдан ҳимояланишига ёрдам беради.
Хўжалик қўлқопидан фойдаланишни ҳам унутманг
Йилнинг исталган фаслида ҳам уй ишларини махсус хўжалик қўлқопларини кийган ҳолда амалга ошириш керак, аммо куз ва қишда бу ҳар қачонгидан ҳам муҳимроқ саналади. Совуқда шундоқ ҳам аҳволи ёмонлашган терини, таркибида кимёвий моддалар бўлган ювиш воситаларидан фойдаланиш билан аҳволини яна ҳам ёмонлаштирмасликка ҳаракат қилинг.
Ҳафтада бир марта тузли ванна қилинг
Қўл териси аҳволини яхши аҳволда сақлаш учун ҳафтада бир марта денгиз тузи солинган ванна қилиш керак. Бу қўлдаги майда ёриқ ва шикастланишларда ёрдам беради, терининг янгиланишини ва аҳволи яхшиланишини таъминлайди. Самарани кўпайтириш учун тузли ваннага бир неча томчи эфир ёғи томизиш ҳам мумкин.
Қўлингизга ниқоб қилинг
Қўлга ниқоб қилиш учун дўконга ошиқишнинг ҳожати йўқ, оддий кремга бир неча томчи ёғ томизиб қўлга қалин қилиб суртиш ва устидан резинали қўлқоп кийиш кифоя. 15-20 дақиқадан кейин ювиб ташлашингиз мумкин. Бундай ниқобдан ҳафтада 1-2 марта фойдаланиш тавсия қилинади.
Скрабдан фойдаланинг
Тери ҳужайраларининг янгиланиши ва қон циркуляцияси яхшиланиши, суртилган крем ва ниқоб самарадорлигини таъминлаш учун ҳафтада икки марта қўл терисини скраб билан тозалаб туриш керак.
Изоҳ (0)