Аёлнинг гўзаллиги нафақат у кийган либос, макияж, балки ундан тараладиган ифорга ҳам боғлиқ бўлади. Cosmetics Business’нинг маълум қилишича, аёлларнинг йилига парфюмерия харид қилиш учун сарфлаган маблағи 51 миллиард долларни ташкил қилади.
J’adore, Dior
Француз тилидан таржимаси сидқидилдан яхши кўришни англатадиган атир 1999 йилда тақдим қилинган ва Шарлиз Терон унинг юзи бўлган. Феминизм, мустақиллик ва кучли феъл-атвор эгаси бўлишга қарамай, аёлларга хос нозикликни ўзида мужассам этишнинг тимсоли бўлган ушбу ифор миллионга яқин нозик жинс вакилларининг энг севимли атирларидан бири бўлган. Орадан 20 йил ўтганига қарамай, ушбу атир Dior уйининг бестселлерларидан бири ҳисобланади.
Chanel №5, Chanel
Тақдим қилинганига 100 йил бўлган атир, 1921 йилда Коконинг истагига биноан ишлаб чиқарилган. Коко Шанелга, Эрнест Бо 10 та композицияда тақдим қилган атирнинг 5-флакондаги ифори ёққан ва унинг номи ҳам шу билан боғлиқ атала бошлаган. Орадан 33 йил ўтиб эса Мерилин Монро журналистларга тунда фақатгина ушбу атирдан фойдаланишини таъкидлаган. Шундоқ ҳам машҳур бўлган атир учун ушбу таъриф яхши реклама бўлган. Chanel №5 бугунги кунда ҳам энг талабгир атирлардан саналади.
Black Opium, YSL
1977 йилда илк Opium тақдим қилиниши кўплаб негатив ва агрессияларга сабаб бўлган. Модалар уйи наркотик ва тартибсиз ҳаёт тарзини пропаганда қилишда айбланган. Ушбу пиар эса одамларни мазкур провакацион атирни янада кўпроқ сотиб олишига сабаб бўлган. Opium’нинг дастлабки варианти 2014 йилда Black Opium тақдим қилингунига қадар бир неча йиллар давомида етакчи бўлган. Бугунги кундаги статистика маълумотига кўра Black Opium, дастлабкисидан икки карра кўпроқ харид қилинади.
Oud & Bergamot Rich, Jo Malone
Американинг Byrdie сайтида тақдим қилинган маълумотларга кўра милленниаллар, яъни 80 йиллар охири 90 йиллар бошида дунёга келган авлод томонидан айнан Oud & Bergamot Rich сотиб олинади. Ушбу одеколон бренднинг энг машҳур ва рекорд даражада кўп сотилган атири ҳисобланади.
Mon Guerlain, Guerlain
Терри Вассер 2017 йилда Mon Guerlain устида иш олиб боришни якунлаганида атир юзи сифатида фақатгина Анжелина Жолини кўришини таъкидлаган. Рекламаларда ҳадеб суратга тушавермайдиган Жоли, бу сафар йўқ дея олмаган. Сотувга чиқарилганининг илк ҳафтасидаёқ пештахталарда қолмаган атир, бугунги кунда ҳам энг кўп харид қилинадиган аёллар учун мўлжалланган атирлардан бири саналади.
L’Air du Temps, Nina Ricci
1948 йилда Нина Риччининг ўғли, парфюмер Францис Фаброндан, урушдан чарчаган Европа аёллари учун бахт, тинчлик ва осойишталикни ўзида мужассам этган ифор тақдим қилишни сўраган. Мушк ва анбар ҳиди тараладиган ушбу ифорнинг аниқ формуласи 60 йилдан ортиқ вақтдан бери сир тутилади. Атир флакони қопқоғини эса тинчлик даракчиси ҳисобланган бир жуфт кабутар безаб туради.
3 L’imperatrice, Dolce&Gabbana
Мазкур атирнинг қироллик мақоми билан ҳеч қандай алоқаси йўқ. Анталогия коллекциясидан ўрин олган атирнинг юзи сифатида модель Наоми Кемпбелл танланган. 3 L’imperatrice тақдим қилинган бошқа атирлардан кўра брендга кўпроқ пул олиб келган.
Изоҳ (0)