Mercedes-Benz компанияси ахборот-кўнгилочар тизим учун мўлжалланган MBUX Hyperscreen инновацион экранини тақдим этди. У автомобиль олд панелини тўлиқ эгаллайди ва сунъий интеллект билан жиҳозланади. Мазкур янгилик 2022 йилда тақдим этиладиган EQS электрокарига серияли равишда ўрнатилади, деб хабар беради Motor.
Экран учта алоҳида экрандан иборат бўлиб, улардан бири олд ўриндиқдаги йўловчи учун мўлжалланган. Тизимнинг барча элементлари битта ойна билан ёпилгани сабаб у автомобилнинг бир четидан иккинчисига қадар чўзилган яхлит экран каби кўринади.
Экран диагонали 56 дюймни ташкил этади. Бу ҳозирги кунда энг йирик дисплей ҳисобланган — 38 дюймли экранга эга Cadillac Escalade’дан сезиларли даражада катта.
Панел бироз эгилган шаклда ишланган, бироқ муҳандислар ҳайратланарли шаффофликка эришишга муваффақ бўлган — ойна 650 даражадан юқори ҳароратда тайёрлангани сабаб у идеал даражада тиниқ. Краш-тестлар, шунингдек, ҳатто жиддий авария ҳолатларида ҳам ойна синмайди — айрим ҳолатларда ёриқлар пайдо бўлиши мумкин, холос.
Аммо ушбу янгиликнинг асосини автомобиль билан «мулоқот»ни максимал даражада қулайлаштирган сунъий интеллект ташкил этади. Масалан, ҳайдовчи бир жойда клиренс режимини ёқса, кейинги сафар машина буни эслаб қолиб, ўзи мустақил ёқади.
Шунингдек, сунъий интеллект амалга оширилган ҳаракатлар вақти ва жойини ҳам инобатга олишга қодир. Агарда ҳайдовчи ҳар сешанба куни кечқурун кимгадир қўнғироқ қилса, тизим буни эслаб қолади ва ўзи ўша рақамга телефон қилиш таклифини беради.
Hyperscreenнинг биринчи серияли версиялари 2021 йилда ишлаб чиқариладиган, серияли дебюти эса 2022 йилда амалга ошириладиган EQS электроседанида пайдо бўлиши кутилмоқда.
Изоҳ (0)