Mercedes-Benz kompaniyasi axborot-ko‘ngilochar tizim uchun mo‘ljallangan MBUX Hyperscreen innovatsion ekranini taqdim etdi. U avtomobil old panelini to‘liq egallaydi va sun’iy intellekt bilan jihozlanadi. Mazkur yangilik 2022-yilda taqdim etiladigan EQS elektrokariga seriyali ravishda o‘rnatiladi, deb xabar beradi Motor.
Ekran uchta alohida ekrandan iborat bo‘lib, ulardan biri old o‘rindiqdagi yo‘lovchi uchun mo‘ljallangan. Tizimning barcha elementlari bitta oyna bilan yopilgani sabab u avtomobilning bir chetidan ikkinchisiga qadar cho‘zilgan yaxlit ekran kabi ko‘rinadi.
Ekran diagonali 56 dyuymni tashkil etadi. Bu hozirgi kunda eng yirik displey hisoblangan — 38 dyuymli ekranga ega Cadillac Escalade’dan sezilarli darajada katta.
Panel biroz egilgan shaklda ishlangan, biroq muhandislar hayratlanarli shaffoflikka erishishga muvaffaq bo‘lgan — oyna 650 darajadan yuqori haroratda tayyorlangani sabab u ideal darajada tiniq. Krash-testlar, shuningdek, hatto jiddiy avariya holatlarida ham oyna sinmaydi — ayrim holatlarda yoriqlar paydo bo‘lishi mumkin, xolos.
Ammo ushbu yangilikning asosini avtomobil bilan “muloqot”ni maksimal darajada qulaylashtirgan sun’iy intellekt tashkil etadi. Masalan, haydovchi bir joyda klirens rejimini yoqsa, keyingi safar mashina buni eslab qolib, o‘zi mustaqil yoqadi.
Shuningdek, sun’iy intellekt amalga oshirilgan harakatlar vaqti va joyini ham inobatga olishga qodir. Agarda haydovchi har seshanba kuni kechqurun kimgadir qo‘ng‘iroq qilsa, tizim buni eslab qoladi va o‘zi o‘sha raqamga telefon qilish taklifini beradi.
Hyperscreen’ning birinchi seriyali versiyalari 2021-yilda ishlab chiqariladigan, seriyali debyuti esa 2022-yilda amalga oshiriladigan EQS elektrosedanida paydo bo‘lishi kutilmoqda.
Izoh (0)