2021 йилда Тошкент Шарқий аэродромида янги фуқаро авиацияси аэропорт комплексининг 1-босқич қурилиш ишлари тугалланади. Лойиҳанинг умумий қиймати 140 миллион долларга тенг. Бу ҳақда «Ўзбекистон Республикасининг 2021—2023 йилларга мўлжалланган инвестиция дастурини амалга ошириш чора-тадбирлари тўғрисида»ги Президент қарорида маълумот берилган.
Қарорга кўра, Тошкент шаҳрининг Яшнобод туманида жойлашган Тошкент Шарқий аэродроми ҳудудида замонавий фуқаро авиацияси аэропорт комплексининг 1-босқич қурилиш ишлари 2021 йилнинг якунига қадар амалга оширилади.
Таъкидланишича, аэродром ҳудудидаги фуқаро авиацияси аэропорт комплекси соатига 250 нафар йўловчига хизмат кўрсатиши мўлжалланган. Лойиҳанинг умумий қиймати 140 миллион доллар бўлиб, шунинг 40 миллион доллар қисми 2021 йилда ўзлаштирилади. Лойиҳанинг сўмдаги қиймати 436 миллиард бўлиб, шунинг 327 миллиард сўми Тикланиш ва тараққиёт жамғармаси молияси, 109 миллиард сўм эса тижорат банклар кредити асосида шакллантирилган.
2017 йил июнь ойида Тошкент Шарқий аэродроми негизида олий даражадаги меҳмонларни кутиб олиш учун авиация мажмуаси қурилиши тўғрисида хабар берилганди. Ўшанда Мудофаа вазирлиги тасарруфида бўлган Тошкент Шарқий аэродроми «Ўзбекистон темир йўллари» АЖ таркибига ўтказилганди. Айни пайтда лойиҳа «Ўзбекистон темир йўллари» томонидан амалга оширилмоқда.
Лойиҳанинг биринчи босқичида учиш-қўниш чизиғи ва суткасига 6 минг йўловчини ўтказиш имкониятига эга бўлган терминал барпо этиш режалаштирилган. Барча қурилиш ишлари 2018—2020 йилларда давом этиши назарда тутилганди.
Мавзуга доир: Тошкент-Шарқий аэродром базасида тадбиркор ва ишбилармон доира вакиллари учун комплекс барпо этилади
Изоҳ (0)