Прогнозлаштириш ва макроиқтисодий тадқиқотлар институти Ўзбекистонда цитрус мевалар нархи нима сабабдан ошиб кетганини таҳлил қилди.
2020 йилда цитрус мевалар экспорти 2019 йилга нисбатан 2,3 минг тоннага ёки 3,4 миллион долларга камайган. Давлатлараро чегараларнинг ёпилиши мамлакатга цитрус меваларнинг олиб келиниш маршрутининг ўзгаришига, қарийб 800 километрга қисқаришига олиб келган, бироқ цитрус меваларни, жумладан, музлатгичли юк машиналарида мандаринларни ташиш нархи ўзгаришсиз қолган.
Аммо шунга қарамай, ўтган йилнинг декабрь ойида мандаринлар нархи 60 фоизга, апельсинлар эса 33 фоизга қимматлашган, бу 2019 йилнинг декабрь охирларига қараганда сезиларли даражада юқори.
«Хориждан олиб келинган мандаринлар таннархининг пастлиги, импорт божларининг ўзгаришсиз қолгани (20 фоиз, аммо килограмми учун 0,20 доллардан кам эмас), етказиб бериш нархи ўзгармагани ва ташиш масофаси қисқарганига қарамай, Ўзбекистон бозорларида мандаринлар нархи юқорилигича қолмоқда», — дейди мутахассислар.
«Йилига 4-5 минг тонна мандарин (умумий импортнинг 18-20 фоизи) республикага темир йўл транспорти орқали, яъни йўловчилар поездида олиб келинган. Ўзбек тадбиркорлари маҳсулотларни Россия улгуржи бозоридан сотиб олган ва божхона божларисиз мандаринларни йўловчилар поезди орқали ташиган (киши бошига 50 килограммгача). Шу сабабли ташилган цитрус мевалар ҳажми умумий статистикада ҳисобга олинмаган. Ҳисобга олинмаган ушбу товар ички бозорга кириб, таклиф ва рақобатни оширган, натижада харидор арзон нархдаги маҳсулотларни сотиб олган», — дейди мутахассислар.
Институт мутахассисларнинг таъкидлашича, келажакда Покистон ва Ўзбекистон ўртасидаги Трансафғон темир йўли қурилиши минтақалараро савдонинг ижобий тарафга ривожланишига хизмат қилади.
Мутахассисларнинг ҳисоблашича, импорт божларининг камайтирилиши ҳам цитрус мевалар таннархининг камайишига сабаб бўлиши мумкин.
«Божхона божларининг пасайтирилиши Ўзбекистон бозорини анча паст нархдаги цитрус мевалар билан бойитиш имконини беради», — дейди институт мутахассислари.
Мавзуга доир: Ўзбекистонда «челнок» савдоси бутунлай тўхтади
Изоҳ (0)