Коррупцияга қарши курашишга муносиб ҳисса қўшган шахсларни мукофотлаш учун ҳар йили давлат бюджетидан қўшимча 500 миллион сўмгача маблағ ажратилади

Ўзбекистонда коррупцияга оид ҳуқуқбузарлик ҳақида ёлғон хабар берган шахслар тегишли тартибда маъмурий ёки жиноий жавобгарликка тортилади. Бу ҳақда 7 январь куни АОКАда бўлиб ўтган матбуот анжуманида Коррупцияга қарши курашиш агентлиги масъул ходими Ўткирбек Номозбоев айтиб ўтди, дея хабар бермоқда «Дарё» мухбири.

Эслатиб ўтамиз, Вазирлар Маҳкамасининг қарори билан Коррупцияга оид ҳуқуқбузарлик ҳақида хабар берган ёки коррупцияга қарши курашишга бошқа тарзда кўмаклашган шахсларни рағбатлантириш тартиби тўғрисидаги низом тасдиқланган.

Коррупцияга қарши курашиш агентлиги директори ўринбосари Умида Тўхташеванинг маълум қилишича, Ўзбекистон давлат бюджетидан ҳар йили ўрта ҳисобда қўшимча 300-500 миллион сўмгача маблағ ажратилади.

«Қозоғистонда давлат бюджетидан 2017–2019 йиллар орасида коррупцияга оид ҳуқуқбузарлик ҳақида хабар бергани учун 708 нафар шахсга 2 миллиард 4 юз миллион сўм, 2021 йилнинг биринчи чорагида эса  44 нафар шахс 176 миллион сўм билан рағбатлантирилган», – дея қўшимча маълумот берди Умида Тўхташева.

Маълумот учун, Коррупцияга оид ҳуқуқбузарлик ҳақида хабар берган ёки коррупцияга қарши курашишга бошқа тарзда кўмаклашган шахсларни рағбатлантириш тартиби тўғрисидаги Низомга кўра, коррупцияга оид ҳуқуқбузарлик ҳақида хабар берган шахслар қуйидаги асослардан бири мавжуд бўлганда бир марталик пул мукофоти билан рағбатлантирилади:

• ўзларига нисбатан пора талаб қилган шахс ёки ўзларига маълум бўлган коррупцияга оид ҳуқуқбузарлик ҳақида коррупцияга қарши курашувчи органлар (Бош прокуратура, Давлат хавфсизлик хизмати, Ички ишлар вазирлиги, Бош прокуратура ҳузуридаги Иқтисодий жиноятларга қарши курашиш департаменти)га берган хабари асосида бундай ҳуқуқбузарлик фош этилса;
• коррупцияга оид жиноятни содир этганлиги учун қидирувда бўлган шахс тўғрисида ҳуқуқни муҳофаза қилувчи органларга берилган хабар асосида қидирувдаги шахс ушланиши (ҳуқуқни муҳофаза қилувчи органларнинг ходимлари бундан мустасно).

Шунга кўра, коррупцияга оид ҳуқуқбузарлик ҳақида хабар берган ёки коррупцияга қарши курашишга бошқа тарзда кўмаклашган шахслар тегишлича БҲМнинг 3 бараваридан 25 бараваригача (669 минг сўмдан 5 миллион 575 минг сўмгача) миқдорда бир марталик пул мукофоти билан рағбатлантирилиши мумкин.

Агар пора суммаси ёки етказилган зарар ёхуд ўзлаштирилаётган (ўзлаштирилган) мулкнинг қиймати БҲМнинг юз бараваридан кўп бўлса, мукофот қуйидаги фоиз ҳисобида ҳисобланади:

• анча миқдор учун — мулк қийматининг 15 фоизи миқдорида;
• кўп ва жуда кўп миқдор учун — мулк қийматининг 10 фоизи миқдорида.

Шахс коррупцияга қарши курашишга муносиб ҳисса қўшганлиги учун давлат мукофотига ҳам тавсия этилиши мумкин. Шахсларни рағбатлантириш масалалари коррупцияга қарши курашувчи органлар ҳузурида тузиладиган махсус комиссиялар томонидан кўриб чиқилади.

Махсус комиссия қарори асосида бир марталик пул мукофоти ёки эсдалик совғаси билан тақдирлаш ҳақида қарор бир иш кунида чиқарилади. Пул мукофоти харажатлар сметасига ўзгартириш киритилгандан сўнг 15 иш куни ичида шахсларнинг шахсий ҳисоб варағига ўтказиб берилади.

Аввалроқ Коррупцияга қарши курашиш агентлиги директори Акмал Бурҳонов давлат амалдорларининг хорижда активлар сотиб олишини тартибга солиш вақти келгани, шунингдек, коррупционэрлар шахси ҳақидаги маълумотлар эълон қилиб бориладиган платформа ишлаб чиқилаётганини маълум қилганди.