«Малика»даги пичоқбозлик акасининг ўчини олмоқчи бўлган ука томонидан содир этилган. Ҳозирда айбланувчи ҳам, жабрланувчи ҳам қидирилмоқда

«Малика савдо мажмуаси»да 2020 йилнинг 8 декабрь куни юз берган пичоқбозлик акасининг ўчини олмоқчи бўлган ука томонидан содир этилган. Бу ҳақда Тергов департаменти «Дарё»га хабар берди.

Жиноят иши бўйича олиб борилган суриштирув ҳаракатлари давомида аниқланишича, 6 декабрь куни 27 ёшли Рустам М. «Малика савдо мажмуаси»нинг ичида 26 ёшли Фаррух Ҳ. билан ўзаро келишмовчилик оқибатида жанжаллашиб кетган. Жанжал давомида Фаррухнинг юз қисмига бир неча маротаба уриб тан жароҳати етказган. Бироқ Фаррух олган тан жароҳати бўйича ҳеч қандай тиббий муассаса ва ИИОга мурожаат қилмасдан, ўзининг яшаш манзилига борган вақтида бўлиб ўтган ҳолат юзасидан укаси Саидаҳмад Ҳ.га айтиб берган. 21 ёшли Саидаҳмад акасига тан жароҳати етказган Рустам М.дан ўч олиш мақсадида уйидан ўзига тегишли бўлган «пакки» пичоғини олиб, «Малика» бозорига борган.

8 декабрь куни соат 13:40 ларда Саидаҳмад «Малика савдо мажмуаси»нинг асосий кириш дарвозаси олдида «пакки» пичоғи билан Рустамнинг бел ва ўнг лунж соҳасига тан жароҳати етказиб, ҳодиса жойидан яширинган. Тошкент Тиббиёт Академияси кўп тармоқли клиникасининг маълумотномасига кўра, жабрланувчига «Бел соҳаси чап ярми санчиб кесилган жароҳати. Ўнг лунж соҳаси кесилган жароҳати» ташхиси билан жарроҳлик амалиёти ўтказилган.

Мазкур ҳолат юзасидан Шайхонтоҳур тумани ИИО ФМБ 4-сонли ИИБ Тергов бўлинмаси томонидан Саидаҳмад Х.га нисбатан Жиноят кодексининг 277-моддаси 2-қисми «в» банди (совуқ қуролни қўллаш орқали содир этилган безорилик) билан жиноят иши қўзғатилган.

Жиноят ишини тергов қилиш даврида тан жароҳати олган Рустам М. Тошкент Тиббиёт Академиясининг кўп тармоқли клиникасидан қочиб яширинган. Уни қидириб топишнинг имкони бўлмаётганлиги сабабли етказилган тан жароҳатининг оғирлик даражасини аниқлаш бўйича суд тиббий экспертиза тайинлашнинг имкони бўлмаган.

Жиноят иши бўйича фуқаро Рустам М.ни қидириб топиш юзасидан соҳавий хизматларга тергов топшириқлари берилган.

22 декабрь куни Саидаҳмад Х. тергов органига келишдан бўйин товлаб қочиб яширинганлиги сабабли унга нисбатан сиртдан ЖКнинг 277-моддаси 2-қисми «в» банди билан айб эълон қилиниб, қамоққа олиш тарзидаги эҳтиёт чораси танланиб, қидирув эълон қилинган.

Жиноят иши юзасидан айбланувчи тариқасида иштирок этишга жалб қилиниши лозим бўлган Саидаҳмад Х. йўқлиги сабабли жиноят иши Жиноят Процессуал Кодексининг 364-моддаси (Дастлабки терговни тўхтатиш асослари ва тартиби) 1-қисми 2-бандига асосан ҳаракатдан тўхтатилган.

Айбланувчини ҳам, жабрланувчини ҳам қидириш ишлари давом этмоқда.