Kia kompaniyasi rasman logotipini o‘zgartirdi va yangi shiorini taqdim etdi. Yangi ramzni namoyish etish uchun Inchon shahri osmoniga rekord miqdorda “pirotexnik dronlar” ko‘tarilgan va yuzlab mushaklar otilgan. Mazkur holat Ginnesning rekordlar kitobidan joy oldi, deb yozadi Motor.
Yangi logotip o‘zida “simmetriya”, “ritm” va “ko‘tarilish” elementlarini mujassamlashtirgan. U ikki o‘lchamli va ovallarsiz, kompaniya nomi esa 1994-yildan beri foydalanib kelingan emblemadan farq qiluvchi shriftda yozilgan. Kompaniyadagilarning tushuntirishicha, logotipning uzluksiz ritmik chizig‘i “brendning mijozlar uchun har qanday munosabatda ilhom onini yaratishga bo‘lgan urinishiga sodiqligini, simmetriya esa ishonch ramzi” hisoblanadi. Ko‘tarilayotgan chiziqlar esa “brendning o‘sishga bo‘lgan istaklarini va u mijozlarga taqdim etayotgan narsalarini” ifodalaydi.
Shior ham o‘zgargan: “San’at hayratga soladi” (The Power to Surprise) o‘rnini “Hayratlantiruvchi harakat” (Movement that Inspires) egallagan.
Kia 303 ta dronni uchirib Ginnesning rekordlar kitobidan joy olgan — bu hozirgi kunda mushakbozlik uchun mo‘ljallangan uchuvchisiz boshqariladigan uchish apparatlarining bir vaqtda osmonga ko‘tarilgan rekord miqdordagi soni hisoblanadi.
Eslatib o‘tamiz, 2020-yilning martida Germaniyaning BMW avtokonserni o‘zining ikki o‘lchamli yangi logotipini taqdim etgandi.
Izoh (0)