Тошкент шаҳридаги Алишер Навоий номидаги давлат академик катта театри олдида 7 январь куни очиқ муз майдони ишга туширилди. Бу ҳақда «Дарё» мухбири хабар бермоқда.
Очиқ осмон остидаги шаҳар муз майдонини Тошкент шаҳар ҳокими Жаҳонгир Ортиқхўжаев очиб бериб, йиғилганларни янги кўнгилочар маскан билан қутлади.
Шунингдек, тадбирда Туризмни ривожлантириш давлат қўмитаси раиси Азиз Абдуҳакимовнинг тантанали маросим учун махсус нутқи ўқиб эшиттирилди. Абдуҳакимов ҳукумат топшириғи бўйича муҳим расмий учрашув сабаб очилишга кела олмагани маълум қилинди.
Президентимизнинг «Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги фармони ижроси доирасида мамлакатимизда аҳолининг спорт билан шуғулланиши ва соғлом турмуш тарзига риоя қилиши учун қатор шароитлар яратилмоқда. Тошкент шаҳрида очиқ осмон остидаги муз майдонининг ишга туширилиши ҳам шулар жумласидандир. Лойиҳадан кўзланган мақсад аҳоли орасида соғлом турмуш тарзи ҳамда спортни кенг тарғиб қилишдан иборат. Юртдошларимиз бир ой мобайнида шу ерга ташриф буюриб, ўз вақтларини мазмунли ва фойдали ўтказишлари мумкин. 2021 йилнинг мамлакатимизда «Ёшларни қўллаб-қувватлаш ва аҳоли саломатлигини мустаҳкамлаш йили» деб эълон қилинганини инобатга оладиган бўлсак, ушбу лойиҳанинг амалга оширилиши айни муддаодир.Тадбирда Россия муз спорти юлдузи, фигурали учиш бўйича Олимпия чемпиони Алексей Ягудин ўзининг «Қиш» дастури билан иштирок этди.Азиз Абдуҳакимов, Туризмни ривожлантириш давлат қўмитаси раиси
Шаҳар марказидаги муз майдони бир ой муддатга ўрнатилган. Бу вақт мобайнида очиқ осмон остидаги муз майдонида қатор маданий-кўнгилочар ва спорт тадбирлари ўтказилади. Концерт ҳудудида Dance Music Fest Winter, Iosis Fest, Tashkent Rap Festival мусиқий фестиваллари, шунингдек, хоккей бўйича ўсмирлар чемпионати, муз устида рақс шоуси каби тадбирлар ўтказилиши режалаштирилган.
Лойиҳа Туризмни ривожлантириш давлат қўмитаси ва Аrt Uz Promotion Agency томонидан пойтахт ҳокимлиги қўллаб-қувватлаши доирасида ўтказилмоқда. Мақсад аҳоли орасида соғлом турмуш тарзи ҳамда спортни кенг тарғиб қилишдан иборат.
«Дарё» мухбири тадбирнинг қизиқарли лаҳзаларини кадрларга муҳрлади.
Очилиш маросимида пойтахтнинг «Бинокор-1» ва «Бинокор-2» жамоаларининг кўргазмали ўйини ҳам намойиш қилинди.
Очилиш маросимига ижтимоий тармоқларда қуюлтирилган сутли «ёнғоқча» пишириғини тайёрлай олишини айтиб, бундан ишлаб топган пулига спорт анжомлари олишда онасига ёрдам беришини ёзган Амир Искаков исмли ёш хоккейчи ҳам таклиф қилиниб, унга Туризмни ривожлантириш давлат қўмитаси томонидан хоккей спорт анжомлари ва махсус спорт кийими олиш учун сертификат совға қилинди.
Изоҳ (0)