«Жиноий гуруҳ таркибида амалдорлар ҳам, фаррошлар ҳам бор». ИИВ вакили Андижонда IMEI кодларни рўйхатдан ўтказишда кузатилган ноқонуний ҳолат ҳақида

2020 йилнинг январь—декабрь ойларида мобил қурилмаларнинг IMEI кодини рўйхатга олишдан махсус ҳисобрақамга 240 миллиард сўм маблағ келиб тушган. Бу ҳақда 4 январь, душанба куни Ўзбекистон Телекоммуникация тармоқларини бошқариш республика марказида ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.

Ички ишлар вазирлиги масъул ходими Бахтиёр Сулаймоновнинг айтишича, мобил қурилмалар IMEI кодини рўйхатдан ўтказиш мақсадида фуқароларнинг паспорт маълумотларининг сотилиши ёки ўзлаштирилиши ва бошқа шахснинг номига расмийлаштириш каби ноқонуний хатти-ҳаракатлар ҳам кузатилмоқда. Бундай ҳолат охирги марта 2020 йилнинг октябрь ойида аниқланган ва бу бўйича жиноят иши қўзғатилган.

«Мазкур масалада 7 мингга яқин расмий мурожаат келиб тушган. Ушбу рақам бошида камроқ эди, аммо мурожаатлар ўрганилганда, бундай ҳолатларнинг аниқлангани ҳозирча 7 мингга яқинлашди. Балки, бундан ҳам ошар, чунки тергов ҳаракатлари давом эттириляпти. Мурожаат қилган фуқароларнинг шикоятларини рўйхатга олиб, терговга йўналтирганмиз», — деди Сулаймонов.

Унинг қўшимча қилишича, фуқароларнинг паспорт маълумотлари асосида бошқа шахс номига мобил қурилмалар IMEI кодини рўйхатдан ўтказиш ҳолати Ўзбекистондаги ҳамма карантин зоналарида кузатилган.

«Андижон вилоятида кузатилган бундай ҳолат уюшган жиноий гуруҳ томонидан амалга оширилганлиги аниқланган. Уюшган жиноий гуруҳ таркибида карантин зонада ишлаган оддий фаррошдан тортиб, мансабдор шахсгача бор. Ким қайси даражада жиноят содир қилгани ҳали маълум эмас. Бу бўйича тергов жараёни давом этмоқда. Яна ҳолатлар аниқланиб, терговга қўшиб бориляпти. Кимлар мурожаат қилмаган бўлса, уларни ўзимиз аниқлаб, чақириб, ҳолат ҳақида батафсил сўраб оляпмиз.

Юқорида айтилган 7 мингга яқин ҳолатнинг 5 мингтадан ортиғи уюшган жиноий гуруҳ томонидан содир этилган. Ҳозир бу ҳақда аниқ рақамни билмайман, очиғи. Чунки бундай ноқонуний ҳолат республикадаги барча карантин зоналарида кузатилган. Битта Андижонда эмас, Тошкент вилояти ва бошқа жойда ҳам кузатилган», — деди ИИВ расмийси.

Аввалроқ Андижон вилояти ИИБ ходимлари томонидан фуқароларнинг шахсига доир маълумотлардан ноқонуний фойдаланиб, уларнинг номига IMEI тизими орқали телефонларни рўйхатдан ўтказиш билан шуғулланиб келган шахслар қўлга олингани, ҳолат юзасидан Жиноят кодексининг 182-модда 2-қисми (божхона тўғрисидаги қонун ҳужжатларини бузиш) ҳамда 141-модда 1-қисми (фуқароларнинг тенг ҳуқуқлилигини бузиш) билан жиноят иши қўзғатилгани ҳақида хабар қилинган эди.