Давлат солиқ қўмитаси олтита тиражда ютуқли чек ўйинлари ўтказиб, уларнинг ҳар бирида 120 та қимматбаҳо совринлар, шу жумладан 6 та Chevrolet Nexia-3 автомобили ўйналди. Бу ҳақда қўмита матбуот хизмати хабар берди.
2020 йил июль ойида бошланган чек ўйинлари қуйидаги мақсадда ўтказилган:
- истеъмолчиларни яширин иқтисодиётга қарши курашга йўналтириш: ютуқли чек ўйинлари фуқароларнинг харид қилинган товарлар (ишлар ёки хизматлар) учун тўлов фактини тасдиқловчи чеклар ва бошқа ҳужжатларни талаб қилишга одатланишига туртки бўлди.
- савдо ва хизмат кўрсатиш соҳасидаги ҳисоб-китобларни тартибга солиш, тушумни кирим қилмасликка одатланганларни ҳалол йўлга қайтариб, қонунларни ҳурмат қилувчи корхоналар билан тенг шароитларда рақобатлашишга бошлаш.
«Ўйиннинг биринчи тиражида жами 1,8 миллиард сўмлик 9 947 та чек иштирок этган бўлса, олтинчи тиражда рақамлар сезиларли даражада йириклашди — 63,3 миллиард сўмлик 159 774 та чек рўйхатдан ўтказилди. Яъни иштирокчилар сони 17 марта ошди», — деб қайд этилган қўмита хабарида.
Ютуқли ўйинни ўтказиш даврида (2020 йил июлдан) онлайн-НКМ ёки виртуал кассалардан жами 51,5 миллион дона 14,2 триллион сўмлик чеклар чоп этилган.
Бундан ташқари, қўмита онлайн-НКМларни қўллаш борасида юз бераётган қоидабузарликлар ҳақида ДСҚнинг «Солиқ ҳамкор» тизими ва алоқа манбалари орқали фуқаролар мурожаатлари кўпайганини қайд этган.
«Чек ўйинлари туфайли онлайн-НКМдан тушумлар республикада жами 9,6 триллион сўмни ташкил этди, шундан 4,5 триллион сўм Тошкент шаҳри ҳисобига тўғри келди. Таққослаш учун, биринчи тираж ўтказилган даврга нисбатан тушумлар 6,2 марта ўсган», — дейилади ДСҚ хабарида.
Солиқ қўмитаси муҳим иқтисодий самарадан ташқари, аҳолининг истеъмол маданияти ва фаол жамоатчилик назорати ошганлигини ҳам қайд этган.
Давлат солиқ қўмитаси ютуқли чек ўйинлари 2021 йилда ҳам давом этишини билдирган.
Изоҳ (0)