Reuters: Arab davlatlari Qatarga nisbatan diplomatik qamalni bekor qilishga kelishib oldi

Saudiya Arabistoni, BAA, Bahrayn va Misr Qatarga nisbatan 2017-yilda joriy qilingan diplomatik qamalni bekor qiladi. Bu haqda Reuters AQSh prezidenti Donald Tramp ma’muriyatidagi yuqori mansabli amaldorga tayanib xabar berdi, deb yozadi “RBK”.

“Biz Fors ko‘rfazi mamlakatlari hamkorlik kengashida yutuqqa erishdik”, — dedi manba.

Qamalni bekor qilish va mamlakatlar o‘rtasidagi aloqalarni normallashtirish haqidagi kelishuv 5-yanvar kuni imzolanadi. Qatar bunga javoban arab mamlakatlariga nisbatan da’volardan voz kechadi.

Agentlik hamsuhbatiga ko‘ra, qamalni bekor qilish haqidagi bitimga Trampning kuyovi va bosh maslahatchisi Jared Kushner yordamida erishilgan. U hujjatni imzolashda ham ishtirok etadi.

Reuters Kuvayt TIVga tayanib xabar qilishicha, 4-yanvar, dushanbadan Saudiya Arabistoni Qatar bilan aviaqatnovni qayta tikladi, quruqlik va dengiz chegaralarini ochdi.

Shu xabardan keyin Qatar shayxi Tamim bin Hamad at-Taniy uch yil ichida birinchi marta Fors ko‘rfazi mamlakatlari sammitiga tashrif buyurishi haqida amir saroyi bayonot berdi. Tadbir 5-yanvar kuni bo‘lib o‘tadi.

Nashr qayd etishicha, Qatarga nisbatan siyosiy boykotni to‘xtatish Tramp ma’muriyatining Yaqin Sharqda Eronga qarshi alyans yaratish bo‘yicha rejasi bandlaridan biri hisoblanadi. Shu munosabat bilan Vashington 2018-yildan mintaqada o‘z diplomatik pozitsiyalarini mustahkamlashni boshlagan.

2017-yil iyunida Bahrayn, Saudiya Arabistoni, BAA, Misr, Yaman, Liviya muvaqqat hukumati, Maldiv, so‘ng esa Mavritaniya va Komor orollari Qatarni terrorchilarni qo‘llab-quvvatlashda va ularni moliyalashtirishda ayblab, u bilan diplomatik aloqalarni uzgan edi. Shundan keyin amirlikka qarshi iqtisodiy sanksiyalar va transport qamali joriy etildi.

Qatar amiri shayx Tamim bin Hamad At-Taniy keyinroq amirlikning boykot qilinishi mamlakat obro‘sini to‘kish uchun oldindan rejalashtirilganini aytdi. Shu bilan birga, u Doha Qatarning suvereniteti hisobga olinadigan muzokaralarga tayyorligini ta’kidladi. Qatar vaziyat yuzasidan afsus bildirib, arab qo‘shnilari qarorini asossiz deb atadi.