Сурхондарёда Янги йил куни одам уриб, воқеа жойидан яширинган ҳайдовчи ушланди, дея хабар қилмоқда ИИВ ЙҲХББ ахборот хизмати.
Маълум қилинишича, 2021 йил 1 январь куни соат 21:00 лар атрофида Сурхондарё вилояти Шўрчи туманининг «Саксонкапа» МФЙ ҳудудидан ўтувчи 4К–592 автомобиль йўлининг 11-километрида йўл-транспорт ҳодисаси содир бўлди.
Шўрчи–Олтинсой йўналишида кетаётган номаълум транспорт воситаси ҳайдовчиси мазкур йўлда ҳаракатланиб кетаётган пиёда–туманнинг «Бахшитепа» МФЙда яшаган, 1985 йилда туғилган фуқарони транспорт воситасининг олд томони билан туртиб юбориб, ҳодиса жойидан номаълум томонга яширинган.
Натижада 36 ёшли фуқаро турли даражада тан жароҳатлари олиб, касалхонада вафот этган.
Олиб борилган суриштирув ишлари натижасида ушбу жиноятни туманнинг «Оққўрғон» маҳалласида яшовчи, ишсиз, 1995 йилда туғилган И.Р. содир этгани ва ҳодиса содир бўлган жойдан олинган ашёвий далиллар унинг бошқарувида бўлган Nexia-2 русумли автомашинага тегишли эканлиги аниқланган.
Ҳолат юзасидан 2020 йилнинг 2 январь куни И.Р.га нисбатан Жиноят кодексининг 266-моддаси 2-қисми (одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) ва 117-моддаси 2-қисми (ҳаёти ёки соғлиғи хавф остида қолган ва ўзини ўзи ҳимоя қилиш имкониятидан маҳрум бўлган шахсга ёрдам кўрсатмаслик) билан жиноят иши қўзғатилган.
Аввалроқ Қамчиқ довонида сув хўжалиги вазирининг ўринбосарига тегишли Gentra жарликка қулаши оқибатида амалдорнинг рафиқаси ва 3 ёшли қизи вафот этгани ҳамда Оқдарёда ортидан юк машинаси келиб урган автобус пастликка ағдарилди, бир йўловчи касалхонага ётқизилгани ҳақида хабар берилганди.
Изоҳ (0)