Япониянинг Осака шаҳрида Aspark компаниясининг биринчи шоуруми очилди. У ерда дунёдаги энг тезкор ва кучли серияли автомобиль дея эътироф этилган Owl электрогиперкари сотилади. Бир вақтнинг ўзида, ушбу янги моделни Европа ва Шимолий Америкада ҳам харид қилиш мумкин. Машина нархи 2,9 миллион евродан бошланади, деб ёзади Motor.
Ўтган йилнинг охирларида намойиш этилган Owl гиперкарига тўртта электромотор ва сиғими 64 киловатт-соатга тенг 800 волтли батарея ўрнатилган. Агрегатлар умумий ҳисобда 2012 от кучини (2000 Нм) тақдим этишга қодир. Шундай қилиб автомобиль 1900 от кучига эга Pininfarna Battista ва Rimac C-Two, шунингдек, Lotus Evija’ни ортда қолдирди.
Аввалроқ компания тўлиқ узатмали Owl соатига 60 мил тезликка (97 км/соат) 1,69 сонияда эришишини маълум қилганди. Бироқ октябрь ойида Италиянинг Misano World Circuit пойга йўлида ўтказилган синовда гиперкар ушбу масофани 1,72 сонияда босиб ўтган. Машинага пойга шиналари кийгизилган бошқа синовларда ушбу кўрсаткич 1,87 сонияни ташкил этган.
Гиперкарнинг максимал тезлиги — соатига 400 километр. У бир марта қувватланиш орқали 450 километр йўл боса олади.
Owl’нинг мазкур гиперкаридан жами 50 нусха яратилади. Уларнинг 20 таси Европа, яна 20 таси Осиё ва Яқин Шарқ, 10 таси эса — Шимолий Америка учун мўлжалланган.
Изоҳ (0)