Россиянинг Екатеринбург шаҳри учун замонавий ретро-трамвай тайёрланди. TJournal’нинг хабар беришича, бу ҳақда Свердловск вилояти раҳбари Евгений Куйвашев маълум қилган.
Бунинг учун асос сифатида замонавий, паст полли трамвай (71-415 модели) танлаб олиниб, у ХХ аср услубидаги ретро-трамвайга айлантирилган. Унинг умумий сиғими 199 киши бўлиб, ўтириш учун 30 та жойи бор.
«Ташқи томондан: корпусининг дизайни, тахта ўриндиқлари, ҳаммаси ўтган аср вагончаларига ўхшатиб, дид билан тайёрланган. Асоси эса энг илғор технологиялар устига қурилган», — деб ёзган Куйвашев.
Трамвайни тайёрлаган «Уралтрансмаш» компанияси матбуот хизмати ушбу транспорт воситасини «шаҳар рамзига айланиши мумкин бўлган» сайёҳлик объекти сифатида кўраётганини маълум қилган.
Изоҳ (0)