Nigeriya janubidagi Delta shtatida kamida 15 nafar odam noma’lum kasallikdan vafot etgan. Bu haqda mahalliy Vanguard nashri xabar tarqatgan.
Qayd etilishicha, o‘lganlar orasida 18 dan 25 yoshgacha bo‘lgan kishilar ham bor. Shtat ma’muriyati aholiga qilgan murojaatda kasallik tarqalib ketishining oldini olish yuzasidan tegishli choralar ko‘rilishini va’da qilgan.
“Delta shtati ma’muriyati Ute Okpu hamda Idumes aholi yashash joylarida kuzatilgan sirli o‘limlar haqida ma’lumot oldi. Gubernator Ifeani Okova shtat sog‘liqni saqlash vazirligiga ushbu holatlar yuzasidan darhol tergov olib borish va o‘limlarning sababini aniqlash, kasallikning tarqalishining oldini olish bo‘yicha topshiriq bergan”, – deya shtat sog‘liqni saqlash sohasi masalalari bo‘yicha vakolatga ega amaldor Mordi Ononye.
Epidemiologlar vafot etganlarning oilalarida, ular yotgan kasalxonalarda bo‘lib tekshiruv uchun namunalar olgan. Ular odamlarning o‘limiga gemorragik isitma sabab bo‘lgan bo‘lishi mumkinligini gumon qilmoqda.
Gemorragik isitma – virusli kasallik, kuchli isitima, gemorragik sindrom (qon qusish, qon ketishi) bilan kechadi. Ushbu turdagi infeksiyalar sirasiga Denge bezgagi, Ebola hamda Lassa bezgagi kiradi.
Eslatib o‘tamiz, 2020-yil fevral oyida Nigeriyaning boshqa bir shtati Benueda noma’lum kasallikning tarqalgani xabar qilingan. O‘shanda 104 kishi kasallangan, 15 nafar bemor vafot etgandi. Mahalliy shifokorlar buning koronavirus emas, balki boshqa yangi kasallik ekanini bildirgan.
Izoh (0)