АҚШнинг Колорадо штатида коронавируснинг янги B.1.1.7 штамми билан касалланиш ҳолати қайд этилди, деб ёзади Meduza. Колорадо губернатори Жаред Полиснинг баёнотига кўра, бу мамлакатдаги биринчи шундай ҳолатдир.

Фото: Depositphotos

Янги штаммни юқтириб олган одамнинг исм-шарифи сир тутилмоқда. Унинг 20—29 ёш гуруҳига кириши маълум, холос. Ҳукумат маълумотларига қараганда, бу одам узоқ сафарларга чиқмаган. Мутахассислар унинг мулоқот доирасини аниқлаштирмоқда. Бемор Денвердан жануби-шарқда жойлашган Элберт округида яккаланиш режимига ўтказилган.

Колорадода яна бир киши коронавируснинг янги штамми билан касаллангани гумон қилинмоқда, деб ёзади Colorado Politics. Бу одам ҳам, биринчиси каби, Элберт округидаги Симла шаҳрида ишлайди. Уларнинг ҳеч бири бу округда яшамайди, бу B.1.1.7 штамми бутун штат бўйлаб тарқалгани эҳтимолини оширмоқда.

Буюк Британияда сентябрь ойида коронавируснинг янги, юқумлироқ B.1.1.7 штамми аниқланди. Декабрь ўрталарига келиб, Лондондаги касалланиш ҳолатларининг учдан икки қисми вируснинг шу варианти билан боғлиқ бўлиб қолди. 20 декабрдан Британия ҳукумати янги штамм туфайли коронавирусга қарши чекловларни кучайтирди. Айни вақтда янги штамм бошқа мамлакатларда ҳам қайд этила бошлади. Хусусан, Канада, Италия, Ҳиндистон, Бирлашган Араб Амирликларида «британча» штамм аниқланган.