Эронда 29 декабрь куни коронавирусга қарши вакцинанинг клиник синовлари бошланди, деб хабар берди Tasnim News.
Эронлик мутахассислар томонидан ишлаб чиқарилган вакцина билан дастлабки иккита кўнгилли, жумладан, вакцинани ишлаб чиқаришга масъул бўлган Имом Хумайний буйруқларини бажариш бўйича штаб раисининг қизи эмланди.
Ташкилот раиси Муҳаммад Моҳбернинг хабар беришича, «душман ва инқилобга қарши оммавий ахборот воситалари томонидан бошланган ташвиқот кампаниясига қарамай», мамлакатнинг 60 минг фуқароси вакцина синовларида иштирок этиш учун ихтиёрий равишда қатнашган. Унинг таъкидлашича, аслида вакцинани синаб кўриш учун турли жинс ва ёшдаги 56 киши керак эди.
Шу билан бирга, Моҳбернинг таъкидлашича, вакцинани одамларда синовдан ўтказишда Эрон Жаҳон соғлиқни сақлаш ташкилоти томонидан тавсия этилган хавфсизлик чораларига риоя қилади ва штаб кейинчалик 1,5 миллион дозагача вакцинани қабул қилиб олади.
Унинг қўшимча қилишича, келаси олти ой ичида Эрон вакцина ишлаб чиқаришни ойига 12 миллион дозага етказади.
Жонс Ҳопкинс маълумотларига кўра, пандемия бошлангандан бери Эронда 1,2 миллиондан ортиқ одамда коронавирус аниқланган. Беморларнинг 54,8 мингдан ортиғи вафот этган, 960 мингдан ортиғи соғайган.
Аввалроқ Қозоғистон кўнгиллиларни маҳаллий вакцина билан эмлашни бошлагани, Ўзбекистонда 488 нафар кўнгилли коронавирусга қарши эмлангани ҳамда Ўзбекистон инновацион ривожланиш вазири Хитой вакцинаси масаласида аҳолини хотиржамликка чақиргани ҳақида хабар берилганди.
Изоҳ (0)