Коронавирус пандемияси жиддий экологик оқибатларга олиб келиши мумкин. Бунга сабаб 2020 йил ишлаб чиқарилган 52 миллиард тиббий ниқобнинг 1,5 миллиардидан ортиғи бу йил дунё океанига ташланган бўлиши мумкин. Бу ҳақда океанларни ҳимоя қилувчи ташкилот – Oceans Asia томонидан эълон қилинган.
Экологик фаолларнинг ҳисоб-китобларига кўра, бу дунё океанининг 4680–6240 тонна пластик билан қўшимча ифлосланишига олиб келади. Ниқоблар полипропилен – юпқа пластик толалардан тайёрланади, улар парчаланиши учун 450 йил керак бўлади. Ташкилот таъкидлашича, вақт ўтиши билан ниқоблар парчаланиб, микроскопик пластик заррачаларга айланади ва бу океанлар экотизимларига жиддий хавф туғдириши мумкин.
«Океаннинг пластик ифлосланиши ҳар йили 100 мингга яқин денгиз сутемизувчи ва тошбақаларини, миллиондан ортиқ денгиз қушларини ва ҳатто ундан ҳам кўпроқ балиқларни, умуртқасиз ҳайвонлар ҳамда бошқа жонзотларни нобуд қилмоқда», – дейди Oceans Asia директори Гери Стоукс.
У шунингдек, ифлосланиш балиқчилик ва сайёҳлик саноатига ҳам салбий таъсир кўрсатиши ва дунё иқтисодиётига йилига 13 миллиард доллар зарар етказишини таъкидлади.
Океан ифлосланишига қарши кураш чораларидан бири сифатида ташкилот ҳукуматларига кўпмарталик ниқоблардан фойдаланишни рағбатлантириш ва бир марталик полипропилен ниқобларнинг барқарор альтернативаларини ишлаб чиқишда ёрдам беришни маслаҳат берди.
Аввалроқ Ўзбкистон Инновацион ривожланиш вазири ишлатилган ниқобларни кўчага ташламасликка чақирганди.
Изоҳ (0)