Американинг президент Трамп раҳбарлигидаги жорий маъмурияти янги кейинги маъмуриятга ишларни топшириш жараёнида ўзини масъулиятсиз тутмоқда. Бу ҳақда АҚШнинг янги сайланган президенти Жо Байден маълум қилди, деб ёзади «РБК».
«Биз ҳозир кетаётган маъмуриятдан миллий хавфсизликнинг асосий соҳаларидаги керакли маълумотларни ололмаяпмиз. Менинг фикримча, бу масъулиятсизликдан бошқа нарса эмас», — деди Байден.
Шунингдек, унинг айтишича, кейинги маъмуриятга ваколатларнинг топширилишида АҚШ ҳарбий идорасидаги сиёсий раҳбарият ҳам тўсиқ бўлмоқда. «Баъзи идораларда бизни қўллаб-қувватлашди, бошқаларида эса, биринчи навбатда, Мудофаа вазирлигида сиёсий раҳбарият томонидан бизга тўсиқ яратилди», — деди Байден. Сиёсий раҳбарият томонидан тўсиқлар Оқ уйнинг Маъмурий-бюджет бошқармасида ҳам яратилган.
Байденнинг сўзларига кўра, Америка хавфсизлиги учун муҳим бўлган кўплаб идораларга «улкан зарар етказилган». «Уларнинг кўпчилиги ходимлар, имкониятлар ва маънавий руҳ нуқтаи назаридан тушкунликка тушган», — дея аниқлик киритди у.
Байденнинг баёнотидан кейин Пентагондагилар ваколатларни топшириш жараёни доирасида барча имкониятларни ишга солишаётганини айтди. «Мудофаа вазирлиги кўраётган чора-тадбирлар аллақачон аввалги маъмуриятларнинг худди шундай чора-тадбирларидан ошишга улгурган», — деди АҚШ мудофаа вазири вазифасини бажарувчи Кристофер Миллер. Унинг сўзларига кўра, Пентагон ўтиш даврининг қолган вақтига қўшимча учрашувларни режалаштирмоқда ва маълумот тақдим этиш ҳақида келиб тушган талабномаларнинг барчасига жавоб бермоқда.
Декабрь бошида CNN разведканинг собиқ юқори мансабдаги амалдорига таяниб, Трамп маъмурияти Байденнинг жамоасига ҳокимиятни топшириш жараёни доирасида Пентагон разведка агентликлари билан учрашишга халақит бергани ҳақида ёзганди. Байденнинг сафдошлари идоранинг Разведка бошқармаси ва Миллий хавфсизлик агентлиги вакиллари билан учраша олмаган.
2021 йил 20 январь куни сайланган давлат раҳбари демократ Жо Байден ўз лавозимига киришиши керак. Декабрь ўрталарида сайловчилар ҳайъати Трампнинг сайловдаги бош рақибини Американинг 46-президенти деб эълон қилди. Байден сайловчилар ҳайъати аъзоларининг 300 дан ортиқ овозини, амалдаги президент эса 230 дан зиёдроқ овозни қўлга киритди. Байденнинг инаугурацияси анъанага кўра Вашингтонда бўлиб ўтади.
Изоҳ (0)