Ёзда коронавирусга чалиниб, соғайган Беларусь президенти Александр Лукашенко вирусга қарши эмланмаслигини маълум қилди. Бу ҳақда у Минскдаги болалар юқумли касалликлар шифохонасига ташрифи вақтида таъкидлаб ўтган, деб хабар беради «STV» телеканали.
«Вакцинациядан ўтмайман, эмланмайман — менинг кайфиятим шахсий. Шахсий — президент сифатида эмас. Иммунитет шаклланган, демак, осон бўлади», — дейди мамлакат раҳбари.
Унинг сўзларига кўра, ҳукумат 1,2 миллионга яқин одамни коронавирусга қарши эмлашни режалаштирмоқда. Аҳоли вакцинацияси учун турли ишлаб чиқарувчиларнинг бир нечта вакциналаридан фойдаланилади. «Балки икки миллиондир. Барчаси одамларнинг бунга рози бўлишига боғлиқ», — дейди Лукашенко. Шу билан бирга, президентнинг таъкидлашича, ҳеч ким эмлашга мажбурланмайди.
«Биз вакцинацияни имкониятини тақдим этамиз. Шунингдек, вакцинани танлашни ҳам режалаштиряпмиз», — дея ваъда беради у.
Эмлаш кампаниясининг бошида Россия вакцинасидан фойдаланилади, Беларусь уни нафақат сотиб олишни, балки ишлаб чиқаришни ҳам режа қилган. Лукашенконинг сўзларига кўра, беларусларда беш—олтита дори воситасидан биттасини танлаш имконияти бўлади.
Эслатиб ўтамиз, 28 июлда Беларусь президенти коронавирус юқтириб олганини билдирган, лекин касалликни оёқда ўтказиб енгиб ўтганини айтган эди.
Изоҳ (0)