Пиротехника воситалари ва кучли «Тропикамид» дори воситаларининг ноқонуний савдоси Давлат божхона қўмитасининг Андижон вилояти бўйича контрабандага қарши ва божхона аудити бошқармаси ходимлари томонидан тўхтатиб қолинди. Бу ҳақда Давлат божхона қўмитаси матбуот хизмати хабар берди.
Маълум қилинишича, Бўстон туманида фуқаро Р.А. бошқарувидаги Isuzu русумли юк автомашинаси тўхтатилган ва текширув натижасида мато остига яширилган 288 миллион сўмлик пиротехника буюмлари топилган.
Кейинги божхона текшируви учун юк машинаси вилоят божхона бошқармасига олиб кетилган ва тўлиқ экспертиза давомида ундан 1800 дона қиймати 450 миллион сўм бўлган «Тропикамид» препарати ҳам топилган.
«Шундай қилиб, умумий қиймати 738 миллион сўм бўлган пиротехника маҳсулотлари ва кучли препаратлар ноқонуний муомаладан чиқарилди», — дейилади хабарда.
Аввалроқ Андижон ва Самарқандда ноқонуний пиротехника воситалари савдосига чек қўйилгани, Оҳангаронда ноқонуний тарзда 6800 қутига яқин пиротехника воситалари олиб кетаётган юк машинаси аниқлангани хабар берилган эди.
Изоҳ (0)